Гулистон туманида Сирдарё–Қоракўл мактаб-интернати ўз фаолиятини бошлади (фото)

Гулистон туманида Ўзбекистонда ягона бўлган Қоракўлдаги халқаро математика мактаби билан ҳамкорликда ташкил этилган Сирдарё–Қоракўл мактаб-интернатининг 26 октябрь куни очилиш маросими бўлиб ўтди. Бу ҳақда Сирдарё вилояти ҳокимлиги матбуот котиби Зафар Мирраҳимов «Дарё»га хабар бермоқда.

«Қоракўл халқаро математика мактабини Сирдарё вилоятида ҳам ташкил этиш мақсадида вилоят ҳокими Ғофуржон Мирзаев топшириғи билан бир қатор масъуллар 2019 йил Қоракўл мактабига ташриф буюриб, музокаралар олиб борган эди. Вилоят раҳбарининг ташаббуси бугун ўз самарасини берди.

Мактаб интернатида ўқувчиларга 3 йўналишда таълим берилади. 2020 йилда мактабга 500 нафар ўқувчи ҳужжат топширган бўлса, улардан 240 нафари шаффоф тарзда ўтказилган синов асосида ўқишга қабул қилинди. Муассасада математика, физика, кимё, биология ва инглиз тили фанлари чуқурлаштириб ўргатилади. Ўқув жараёни Қоракўл халқаро математика мактаби билан ҳамкорликда ишлаб чиқилган ўқув режалар ва дастурлар бўйича амалга оширилади. 12 нафар бухоролик мутахассислар ўқувчиларга дарс беради. Ҳар бир ўқувчининг ўзлаштириш кўрсаткичи мониторинг қилиниб, индивидуал ишланади», дейилади ҳокимлик ахборотида.

Қайд этилишича, мактаб-интернатининг қурилиши учун маҳаллий бюджетдан 10 миллиард сўм маблағ ажратилди. Замонавий лойиҳа асосида 240 ўринга мўлжалланган икки қаватли ўқув биноси ва ётоқхона, спорт зали, ошхона бунёд этилди. Барча зарур жиҳозлар маҳаллий тадбиркорлар томонидан ишлаб чиқарилган.