Тошкент вилояти Тошкент туманида олиб борилаётган ободонлаштириш ва қайта қуриш ишлари муносабати билан айрим автомобиль йўлларида автомототранспорт воситаларининг ҳаракати вақтинчалик тўхтатилмоқда. Бу ҳақда «Дарё»га Тошкент вилояти ИИББ ЙҲХБ ахборот хизмати маълум қилди.
Хабар берилишича, автомобиль йўлларида олиб борилаётган реконструкция ишлари муносабати билан, Тошкент туман ҳокимининг қарорига асосан 26 октябрь кеч соат 00:00 дан бошлаб таъмирлаш ишлари тугагунига қадар 4R-4 Тошкент шаҳри—Келес шаҳри—Қозоқкенцой қишлоғи—М39 автойўли (820-километр автомобиль йўлининг 0–2-километрлари ёпилади. Яъни йўлнинг Келес кўпригидан 9-сон умумтаълим мактаби олдигача бўлган қисмида транспорт воситалари ҳаракати вақтинчалик тўлиқ тўхтатилади.
Ушбу йўналишда ҳаракатланадиган автомототранспорт воситаларининг ҳаракати вақтинчалик туманнинг Ҳасанбой қишлоғи ҳудудидан ўтган 4N-699 ҳамда М.Фозилов жамоа хўжалиги ҳудудидан ўтган 4R-4 автомобиль йўллари ҳамда 4К-708а автомобиль йўли орқали ташкил этилади.
«Тошкент вилояти ИИББ ЙҲХБ юзага келган ноқулай вазият учун ҳаракат иштирокчиларидан узр сўраган ҳолда ЙПХ инспекторлари томонидан кўрсатиладиган йўналишлар бўйича ҳаракатланишга, тартиб интизом сақлашга ҳамда ҳаракатланиш хавфсизлигини таъминлашга ҳисса қўшишга чақиради. Йўл очилганлиги тўғрисида алоҳида маълумот берилади», — дейилади хабарда.
Изоҳ (0)