Microsoft асосчиси Билл Гейтс барча синов босқичидан ўтган коронавирусга қарши вакцина АҚШда келаси йил бошларида пайдо бўлишини айтди. «РБК»нинг хабар беришича, бундай прогнозни у All Markets Summit интернет-конференциясида Yahoo Finance бош муҳарририга маълум қилди.

Фото: Getty Images

«Агар омад кулиб боқса, бизда ҳозир учинчи босқич синовида бўлган олти препаратдан икки ёки учтаси бўлади. Pfizer’да биринчи бўлиш имконияти бор. У вакциналар ишлаб чиқариш бўйича жуда тажрибали компания ва у ўз тадқиқотини жуда пухта режалаштирган», — деган Гейтс.

Миллиардер, шунингдек, AstraZeneca, Johnson & Johnson, Novavax, Moderna ва Sanofi айни пайтда учинчи босқич синовларда бўлган ўз вакциналарини йил бошидаёқ чиқаришига умид билдирган.

Шу билан бирга, Гейтс дастлабки вакциналар идеал бўлмаслиги ҳам мумкинлигини тан олган. «Биринчи олтитадан иккитаси ёки учтаси маъқулланган тақдирда ҳам, касалликнинг ва вирус юқтиришнинг олиш борасида уларнинг самарадорлиги идеал бўлмаслиги мумкин», — деган у.

«Лекин катта эҳтимол билан COVID-19’га қарши вакциналар кейинги йилнинг кейинги учрашувида бугунга қараганда яхшироқ шароитда бўлишимиз учун етари бўлади», — деб таъкидлаган ва «биз бари бир одатдаги ҳаётга қайтмаймиз», деб қўшимча қилган.

Билл Гейтс пандемия тугаши борасида бир неча марта ўз прогнозларини билдирган. Унинг сўнгги прогнозларига кўра, коронавирус пандемияси билан боғлиқ вазият 2020 йилнинг ёзидагидан кўра ёмонлашиши мумкин. «Касалланганлар сони ортмоқда, совуқ келиши билан одамлар кўпроқ бино ичида бўлади, бу эса вируснинг юқиш имкониятини оширади», — деган миллиардер.

У Fox телеканалига берган интервьюсида коронавирус пандемияси энг яхши ҳолатда 2022 йили якунланишини маълум қилган. Fox Гейтс билан интервьюни миллиардер томонидан асос солинган фонд COVID-19’га қарши курашга 650 миллион долларгача хайрияни амалга оширганидан сўнг эълон қилган.

«Эпидемия, тахминан, 2022 йилга бориб якунланади. Аммо вирус тарқалишига қарши кураш чораларига глобал даражада ёндашадиган бўлсак, 2021 йил давомида биз унинг тарқалиш кўрсаткичини камайтиришимиз мумкин. Худога шукр, вакцина технологияси ҳозирда бор, молиялаштириш ҳам етиб келди, компаниялар энг яхши мутахассисларни бунга жалб этган. Шу сабабли оптимистик жиҳатдан бу абадий давом этмайди деган умиддаман», — деган Гейтс.

Билл Гейтс фонди томонидан коронавирусга қарши кураш йўлида хайрия қилинган 650 миллион доллар бу каби ташкилотлар томонидан амалга оширилган рекорд сумма ҳисобланади. Шу йилнинг январь ойида Билл Гейтс Хитойга коронавирус билан курашиш учун 5 миллион доллар ажратганди.