Россия истеъмолчилар ҳуқуқларини ҳимоя қилиш ва инсон фаровонлиги соҳасидаги кузатув бўйича федерал хизмати («Роспотребнадзор») раҳбари Анна Попова ўзи имзолаган қарор билан Россия фуқароларига одамлар оммавий тўпланадиган жойларда, транспортда, автомобиль тураргоҳларида ва лифтларда ҳимоя ниқобларини тақиш мажбуриятини юклади, деб ёзади Meduza.
Бундан ташқари, «Роспотребнадзор» 23:00 дан 6:00 гача кўнгилочар-томоша тадбирлари ўтказилишини ва умумий овқатланиш хизматларини кўрсатишни тақиқлашни тавсия этди.
Транспортда, таксиларда, дўконларда, ресторанларда ва театрларда дезинфекция режими кучайтирилиши керак. Ҳудудларга ҳар 100 минг аҳолига камида 150 та коронавирус тестини ўтказиш тавсия қилинди.
Янги чеклов чоралари Россияда «ўткир респиратор вирусли инфекциялар ва грипп билан касалланиш мавсумий авж оладиган даврда» коронавирус тарқалиши хавфларини камайтириш мақсадида жорий қилинган. Қарор 28 октябрдан кучга киради.
Эслатиб ўтамиз, Дунёда коронавирус билан касалланганлар сони 43 миллион кишидан ошди. Касалликка чалиниш ҳолатлари бўйича АҚШ ҳамон етакчилик қилмоқда — мамлакатда 8,63 миллион кишида COVID-19 тасдиқланган. Ҳиндистон 7,90 миллион кўрсаткич билан иккинчи, Бразилия эса 5,39 миллион кўрсаткич билан учинчи ўринда. Ундан кейинги поғоналарни Россия (1,52 миллион) ва Франция (1,18 миллион) эгаллаган.
Изоҳ (0)