Кетма-кет узатилган«Барселона» ва «Реал Мадрид», Ҳабиб ва Гэтжи, "Манчестер Юнайтед" ва "Челси" баҳслари муҳокамаси шовқини тинмай туриб, дайжестимизни бошлаймиз. Ҳафтанинг энг муҳокамали ва долзарб янгиликлари бизда.
Шавкат Мирзиёев 2020 йилнинг 10 апрель куни «Ўзбек тили байрами кунини белгилаш тўғрисида» қонунни имзолаганди. Қонунга кўра, 21 октябрь Ўзбек тили байрами куни этиб белгиланган. Бу ҳафта Шавкат Мирзиёев ўзбек тилини ривожлантириш бўйича 2030 йилгача мўлжалланган чора-тадбирлар тўғрисидаги фармонни имзолади. Фармонга мувофиқ ўзбек тилини ривожлантириш концепциясининг асосий йўналишларини ушбу хабарда ўқинг. Фармондаги асосий нуқта шуки, Ўзбекистонда масъул лавозимга тайинланадиган шахслар учун ўзбек тилини билиш бўйича даража сертификати жорий этилади. Демак, мансабдорлар орасида ўзбек тилини билувчилар кўпайишидан умид қилсак бўлади.
Шавкат Мирзиёев ўзбек тилига давлат тили мақоми берилган кун муносабати билан Ўзбекистон халқига табрик йўллади. Миллий байрамларимизда ўзбекча лафз билан шеърлар ўқувчи АҚШ элчиси Дэниэл Розенблюм ҳам ўзбек тили байрами билан қутлаб, бу сафар Аваз Ўтарнинг "Тил" шеъридан бир парча ўқиб берди.
* * *
UzAuto Motors ва депутатлар ўртасидаги тортишув ҳақида ўтган ҳафта дайжестида тўхталган эдик. UzAuto Motors’чилар бу ҳафта баҳсни янги поғонага олиб чиқишди. Ташкилотни ҳамиша тролл қилувчи @trolluz жиддий постлар билан миллий монополга таъсир ўтказишга уринмоқда. Бунинг учун блогер Умид Ғафуров Telegram’да @stopuzam каналини ташкил этиб, унда миллий автомобилларимизнинг заводдаёқ камчилик билан чиқарилаётганини видеодалиллар билан фош эта бошлади. Автосаноат вакиллари эса блогерни сотиб олиш учун унга номсиз аккаунтлардан турли таклифлар билан алоқага чиқмоқда.
«Кимдир барчани сотиб олиш мумкин деб ўйлайди. Дарвоқе, ҳа – менинг машиналар ҳақидаги постларим бу буюртма. Оддий халқнинг буюртмаси. Қулай нархларда сифатли автомобилларга лойиқ одамларнинг буюртмаси. Баъзилар буни тушунолмайди. Улар учун ҳақиқатни гапирадиган ҳар ким – буюртмага ишлайдиган одам. Шу Британиянинг SIM-картасига эга бўлган ушбу шахсга ўхшаб», деб ёзмоқда блогер. Аммо ушбу воқеаларнинг бари ошкор этилиши билан йиғув цехларида назорат кучайганини ҳам инсайдерлар ёзган.
* * *
Кўпгина хорижий давлатларда ўқувчининг мактабда олган баҳоси ОТМга киришда эътиборга олинади, ҳатто битирув имтиҳони балли билан ОТМга кириши мумкин. Энди бу тажриба бизда ҳам бўлади. Тўғри, битирув имтиҳони балли билан институтга кирита олмаймиз-у, аммо мактаб битирувчиларининг олти йиллик баҳолари ОТМга кириш имтиҳонида инобатга олинади. Бу мавзуда Халқ таълими вазири Шерзод Шерматов «Ўқувчи мактабда 11 йил ўқияпти, лекин тақдири бир кунда ҳал бўляпти. Балки, ўша куни касал бўлгандир, балки яхши ухламагандир. Шу боис Президентимиз бу бўйича топшириқ берганлар, ўқувчиларнинг мактабда олган баҳолари, яъни охирги олти йиллик натижалари инобатга олинади», — деб айтди. Демак, олий маълумот олишни истасангиз, 6-синфданоқ баҳоларни яхшиланг.
* * *
Партияларимизда ўзгариш. «Сўл»чи партия «Адолат» етакчиси Наримон Умаров Олий Мажлис Сенати аъзоси этиб тайинланди. Наримон Умаров Сенатнинг Суд-ҳуқуқ масалалари ва коррупцияга қарши курашиш қўмитаси раиси этиб сайланди. Партияга эса тўққиз йилдан бери Фанлар академиясининг вице-президенти бўлиб ишлаб келаётган тарих фанлари доктори Баҳром Абдуҳалимов раис этиб сайланди. Баҳром Абдуҳалимов Шарқшунослик институти директори, Ўзбекистон Президенти давлат маслаҳатчиси лавозимларида ишлаган.
* * *
Бу ҳафта ҳаво ҳарорати пастлади, қишнинг совуқ нафаси сезилди. 22–23 октябрь кунлари мамлакатнинг айрим ҳудудларида ёғингарчилик бўлди. Қамчиқ довонида биринчи қор ёғди. Аммо ҳафтанинг иккинчи ярми яхши об-ҳаво билан келди. Гидрометеорологларнинг айтишича, келгуси ҳафтада табиат инжиқлик қилмай туради, октябрни яхши об-ҳавода кузатамиз.
* * *
Қашқадарёда суюқликдан газ олувчи завод қураётган ишчилар ғалаён кўтарди. Гап Uzbekistan GTL заводини қураётган пудратчи Enter Engineering компаниясининг ишчи-ходимлари ҳақида кетмоқда. Тарқаб кетган видеоларга қарасак, ўнлаб норози ишчи компания мол-мулкини синдириб-бузиб ташлаганини кўриш мумкин.
Дастлаб ишчиларга ўз вақтида нонушта берилмагани бунга сабаб бўлгани айтилди. Натижада буюртмачига қарашли дераза ойналари, офис жиҳозларини дарғазаб ишчилар синдириб ташлаган. Воқеа жойига «Ўзбекнефтгаз» компанияси, Enter Engineering раҳбарияти ва Қашқадарё ҳокимлиги вакиллари етиб борди ва ҳолатни ўрганди. Завод ишчиларининг норозилигига ётоқхонада ишчилар учун жой йўқлиги, уч ойдан буён маош тўланмаётгани ва бошлиқлар ишчиларига қўпол муносабатда бўлаётгани ҳам сабаб бўлгани ойдинлашди, аммо ГТЛ бош директори бу гапни инкор қилди. Enter Engineering сайтимизда реклама ҳуқуқи асосида берган маълумотига кўра эса, ишчиларни ошхонага киритиш электрон тизимидаги техник носозлик сабабли норозилик келиб чиққан.
* * *
Хабарларимиз бошида машҳур аралаш жангчи Ҳабибни тилга олгандик. БААнинг Абу-Даби шаҳридаги «Жангчилар ороли»да ўтказилган UFC 254 мусобақасида икки нафар ўзбекистонлик ҳам жангга чиқди. Лилия Шокирова UFC’даги дебют жангида иккинчи раундда ютқазиб қўйди. Аммо асли Сурхондарёда туғилган ва кейинчалик Қозоғистонга кўчиб кетган Шавкат Раҳмонов биринчи раунддаёқ тажрибали рақибини мағлуб этиб, дебютини ғалаба билан бошлади. Шавкат Раҳмонов Қозоғистон номидан жангга чиқади.
Ҳозирча, дайжестимизга йиққанимиз шулар. Карантин қоидаларига риоя қилинг, ниқоб тақинг, пойтахтдагилар, қўлқоп ҳам тақинг. Уйда қолмасангиз ҳам «Дарё»да қолинг.
Изоҳ (0)