Ketma-ket uzatilgan“Barselona” va “Real Madrid”, Habib va Getji, "Manchester Yunayted" va "Chelsi" bahslari muhokamasi shovqini tinmay turib, dayjestimizni boshlaymiz. Haftaning eng muhokamali va dolzarb yangiliklari bizda.
Shavkat Mirziyoyev 2020-yilning 10-aprel kuni “O‘zbek tili bayrami kunini belgilash to‘g‘risida” qonunni imzolagandi. Qonunga ko‘ra, 21-oktabr O‘zbek tili bayrami kuni etib belgilangan. Bu hafta Shavkat Mirziyoyev o‘zbek tilini rivojlantirish bo‘yicha 2030-yilgacha mo‘ljallangan chora-tadbirlar to‘g‘risidagi farmonni imzoladi. Farmonga muvofiq o‘zbek tilini rivojlantirish konsepsiyasining asosiy yo‘nalishlarini ushbu xabarda o‘qing. Farmondagi asosiy nuqta shuki, O‘zbekistonda mas’ul lavozimga tayinlanadigan shaxslar uchun o‘zbek tilini bilish bo‘yicha daraja sertifikati joriy etiladi. Demak, mansabdorlar orasida o‘zbek tilini biluvchilar ko‘payishidan umid qilsak bo‘ladi.
Shavkat Mirziyoyev o‘zbek tiliga davlat tili maqomi berilgan kun munosabati bilan O‘zbekiston xalqiga tabrik yo‘lladi. Milliy bayramlarimizda o‘zbekcha lafz bilan she’rlar o‘quvchi AQSh elchisi Deniel Rozenblyum ham o‘zbek tili bayrami bilan qutlab, bu safar Avaz O‘tarning "Til" she’ridan bir parcha o‘qib berdi.
* * *
UzAuto Motors va deputatlar o‘rtasidagi tortishuv haqida o‘tgan hafta dayjestida to‘xtalgan edik. UzAuto Motors’chilar bu hafta bahsni yangi pog‘onaga olib chiqishdi. Tashkilotni hamisha troll qiluvchi @trolluz jiddiy postlar bilan milliy monopolga ta’sir o‘tkazishga urinmoqda. Buning uchun bloger Umid G‘afurov Telegram’da @stopuzam kanalini tashkil etib, unda milliy avtomobillarimizning zavoddayoq kamchilik bilan chiqarilayotganini videodalillar bilan fosh eta boshladi. Avtosanoat vakillari esa blogerni sotib olish uchun unga nomsiz akkauntlardan turli takliflar bilan aloqaga chiqmoqda.
“Kimdir barchani sotib olish mumkin deb o‘ylaydi. Darvoqe, ha – mening mashinalar haqidagi postlarim bu buyurtma. Oddiy xalqning buyurtmasi. Qulay narxlarda sifatli avtomobillarga loyiq odamlarning buyurtmasi. Ba’zilar buni tushunolmaydi. Ular uchun haqiqatni gapiradigan har kim – buyurtmaga ishlaydigan odam. Shu Britaniyaning SIM-kartasiga ega bo‘lgan ushbu shaxsga o‘xshab”, deb yozmoqda bloger. Ammo ushbu voqealarning bari oshkor etilishi bilan yig‘uv sexlarida nazorat kuchayganini ham insayderlar yozgan.
* * *
Ko‘pgina xorijiy davlatlarda o‘quvchining maktabda olgan bahosi OTMga kirishda e’tiborga olinadi, hatto bitiruv imtihoni balli bilan OTMga kirishi mumkin. Endi bu tajriba bizda ham bo‘ladi. To‘g‘ri, bitiruv imtihoni balli bilan institutga kirita olmaymiz-u, ammo maktab bitiruvchilarining olti yillik baholari OTMga kirish imtihonida inobatga olinadi. Bu mavzuda Xalq ta’limi vaziri Sherzod Shermatov “O‘quvchi maktabda 11 yil o‘qiyapti, lekin taqdiri bir kunda hal bo‘lyapti. Balki, o‘sha kuni kasal bo‘lgandir, balki yaxshi uxlamagandir. Shu bois Prezidentimiz bu bo‘yicha topshiriq berganlar, o‘quvchilarning maktabda olgan baholari, ya’ni oxirgi olti yillik natijalari inobatga olinadi”, — deb aytdi. Demak, oliy ma’lumot olishni istasangiz, 6-sinfdanoq baholarni yaxshilang.
* * *
Partiyalarimizda o‘zgarish. “So‘l”chi partiya “Adolat” yetakchisi Narimon Umarov Oliy Majlis Senati a’zosi etib tayinlandi. Narimon Umarov Senatning Sud-huquq masalalari va korrupsiyaga qarshi kurashish qo‘mitasi raisi etib saylandi. Partiyaga esa to‘qqiz yildan beri Fanlar akademiyasining vitse-prezidenti bo‘lib ishlab kelayotgan tarix fanlari doktori Bahrom Abduhalimov rais etib saylandi. Bahrom Abduhalimov Sharqshunoslik instituti direktori, O‘zbekiston Prezidenti davlat maslahatchisi lavozimlarida ishlagan.
* * *
Bu hafta havo harorati pastladi, qishning sovuq nafasi sezildi. 22–23-oktabr kunlari mamlakatning ayrim hududlarida yog‘ingarchilik bo‘ldi. Qamchiq dovonida birinchi qor yog‘di. Ammo haftaning ikkinchi yarmi yaxshi ob-havo bilan keldi. Gidrometeorologlarning aytishicha, kelgusi haftada tabiat injiqlik qilmay turadi, oktabrni yaxshi ob-havoda kuzatamiz.
* * *
Qashqadaryoda suyuqlikdan gaz oluvchi zavod qurayotgan ishchilar g‘alayon ko‘tardi. Gap Uzbekistan GTL zavodini qurayotgan pudratchi Enter Engineering kompaniyasining ishchi-xodimlari haqida ketmoqda. Tarqab ketgan videolarga qarasak, o‘nlab norozi ishchi kompaniya mol-mulkini sindirib-buzib tashlaganini ko‘rish mumkin.
Dastlab ishchilarga o‘z vaqtida nonushta berilmagani bunga sabab bo‘lgani aytildi. Natijada buyurtmachiga qarashli deraza oynalari, ofis jihozlarini darg‘azab ishchilar sindirib tashlagan. Voqea joyiga “O‘zbekneftgaz” kompaniyasi, Enter Engineering rahbariyati va Qashqadaryo hokimligi vakillari yetib bordi va holatni o‘rgandi. Zavod ishchilarining noroziligiga yotoqxonada ishchilar uchun joy yo‘qligi, uch oydan buyon maosh to‘lanmayotgani va boshliqlar ishchilariga qo‘pol munosabatda bo‘layotgani ham sabab bo‘lgani oydinlashdi, ammo GTL bosh direktori bu gapni inkor qildi. Enter Engineering saytimizda reklama huquqi asosida bergan ma’lumotiga ko‘ra esa, ishchilarni oshxonaga kiritish elektron tizimidagi texnik nosozlik sababli norozilik kelib chiqqan.
* * *
Xabarlarimiz boshida mashhur aralash jangchi Habibni tilga olgandik. BAAning Abu-Dabi shahridagi “Jangchilar oroli”da o‘tkazilgan UFC 254 musobaqasida ikki nafar o‘zbekistonlik ham jangga chiqdi. Liliya Shokirova UFC’dagi debyut jangida ikkinchi raundda yutqazib qo‘ydi. Ammo asli Surxondaryoda tug‘ilgan va keyinchalik Qozog‘istonga ko‘chib ketgan Shavkat Rahmonov birinchi raunddayoq tajribali raqibini mag‘lub etib, debyutini g‘alaba bilan boshladi. Shavkat Rahmonov Qozog‘iston nomidan jangga chiqadi.
Hozircha, dayjestimizga yiqqanimiz shular. Karantin qoidalariga rioya qiling, niqob taqing, poytaxtdagilar, qo‘lqop ham taqing. Uyda qolmasangiz ham “Daryo”da qoling.
Izoh (0)