Ijtimoiy tarmoqlar va Telegram’dagi ommabop kanallarda 21-oktabr kuni Enter Engineering kompaniyasining Qashqadaryo viloyati G‘uzor tumanidagi obyektlaridan biridagi ishchilarning noroziligi aks etgan videoyozuvlar tarqaldi. Videoda norozi ishchilar tartibsizliklar keltirib chiqarib, kompaniya mol-mulkiga zarar yetkazganini ko‘rish mumkin.
Kadr: Telegram
“Haqiqatan ham 21-oktabr kuni tongda ishchilar uchun mo‘ljallangan oshxonaning monoblok uskunasi (elektron o‘tkazish tizimi)da texnik nosozliklar yuzaga kelgani bois ular o‘z vaqtida nonushtaga kira olmagan. Bu esa ishchilarning ommaviy noroziligi va tartibsizlik harakatlariga sabab bo‘lgan”, — deyiladi Enter Engineering kompaniyasi matbuot xizmati axborotida.
Energetika vazirligidan ma’lum qilishlaricha, 7:30 da boshlangan ishchilarning noroziligi bosh pudratchilar (Enter Engineering, Hyundai Engineering), shuningdek, buyurtmachi (Uzbekistan GTL) ofis binolarining deraza oynalari, ofis jihozlarini sindirish, shuningdek, boshqa vaqtinchalik bino va inshootlar (oshxona, omborlar, nazorat punktlari va boshqalar) buzilishiga olib kelgan.
Soat 9:00 ga kelib qurilish maydonida vaziyat barqarorlashgan, ommaviy tartibsizlik to‘xtatilgan. Hozirda Uzbekistan GTL mutaxassislari tomonidan qurilish maydonchasidagi buzilishlar va keltirilgan zararlar miqdori tekshirilib, tizimdagi nosozliklarni bartaraf etish ishlari olib borilmoqda, ishchi guruhi monoblok tizimidagi nosozlikni tuzatmoqda.
“Ayni paytda ‘O‘zbekneftgaz’ vakillari va Enter Engineering rahbariyati tafsilotlarni bilish va kelajakda shunga o‘xshash hodisalarning oldini olish uchun voqea joyiga yetib bordi”, — deyiladi vazirlik axborotida.
“Ta’kidlash joiz, obyektda ish haqini to‘lash bilan bog‘liq muammolar yuzaga kelmagan — to‘lovlar o‘z vaqtida amalga oshirib kelinmoqda. Bundan tashqari, Enter Engineering kompaniyasi tomonidan ishchilarning qulay turmushi va mehnat faoliyatini olib borishi uchun zarur barcha sharoitlar yaratilgan”, — deya qo‘shimcha qilingan kompaniya bayonotida.
O‘zbekiston Bosh prokuraturasidan ma’lum qilishlaricha, mazkur hodisa Qashqadaryo viloyati prokuraturasi xodimlari tomonidan joyida o‘rganilmoqda.
