Uzbekistan GTL zavodi quruvchilariga bir oyda qancha maosh to‘lanishi ma’lum qilindi

Uzbekistan GTL bosh direktori Faxriddin Abdurasulov jurnalist va blogerlar bilan suhbatda zavod qurilishida ishlayotgan ishchilarga bir oyda 43 milliard so‘m oylik maosh to‘lanishini ma’lum qildi. Bu haqda Energetika vazirligi tashabbusi bilan tashkil etilgan press-turda ma’lumot berildi, deya xabar berdi “Daryo” muxbiri.

OAV vakillari press-tur davomida Uzbekistan GTL bosh direktori Faxriddin Abdurasulovdan ishchilarga nima uchun uch oy davomida maosh to‘lanmagani bilan qiziqdi. Mazkur savolga javob bergan mas’ul ishchilarga uch oydan buyon maosh to‘lanmagani haqidagi gap haqiqatga to‘g‘ri kelmasligini aytdi.

“Ishchilarga uch oylik maosh to‘lanmagani haqidagi xabar haqiqatga to‘g‘ri kelmaydi. Bu yerda ishchilarga maosh to‘lashning ikki xil tartibi yo‘lga qo‘yilgan. Birinchisi, ishchi bajargan ishiga qarab maosh olsa, ikkinchisi, belgilangan ish haqi oluvchi ishchilar ham bor. Bajargan ishiga qarab maosh oluvchi ishchilar ishini bajargan bo‘lsa-da, uni qabul qilib oluvchilar qabul qilishni kechiktirgani sabab sentabr oyi uchun to‘lanishi lozim bo‘lgan maosh kechikkan. Bunda ishni bajarib topshiruvchining ham, qabul qiluvchining ham aybi bor, albatta”, — dedi Faxriddin Abdurasulov.

Bosh direktorning ta’kidlashicha, mazkur jarayonda xato-kamchiliklarga yo‘l qo‘ygan mas’ullarga chora ko‘riladi.

“Hozirgi kunda bu bo‘yicha o‘rganishlar olib borildi. Xato-kamchiliklarga yo‘l qo‘ygan xodimlarga chora ko‘rish masalasi hal etilmoqda. Agar o‘sha mas’ul katta kamchilikka yo‘l qo‘ygan bo‘lsa, hatto ishidan olish yoki boshqa ishga o‘tkazish chorasi qo‘llaniladi”, — dedi Uzbekiston GTL bosh direktori.

Eslatib o‘tamiz, ijtimoiy tarmoqlar va Telegram’dagi ommabop kanallarda 21-oktabr kuni Enter Engineering kompaniyasining Qashqadaryo viloyati G‘uzor tumanidagi obyektlaridan biridagi ishchilarning noroziligi aks etgan videoyozuvlar tarqalgan. Bu holatni izohlagan Enter Engineering kompaniyasi matbuot xizmati ishchilar noroziligiga nonushta o‘z vaqtida berilmagani sabab bo‘lganini ma’lum qildi. Shundan so‘ng Energetika vazirligi Uzbekistan GTL’dagi vaziyat barqarorlashganini, barcha muammo va masalalar joyida ijobiy hal etilganini xabar berdi. Zavod mas’uli Shuhrat Arziyev esa OAV vakillari bilan muloqotda Uzbekistan GTL zavodi qurilishidagi ishchilarining ommaviy noroziligiga ularning ish kuni ko‘payib, dam olish kuni o‘zgarishsiz qolgani ham sabab bo‘lganini ochiqladi. Mazkur holatga batafsil javob berishni niyat qilgan Energetika vazirligi 24-oktabr kuni jurnalist va blogerlar uchun press-tur tashkil qildi.