Uzbekistan GTL zavodi qurilishidagi ishchilarining ommaviy noroziligiga ularning ish kuni ko‘payib, dam olish kuni o‘zgarishsiz qolgani ham sabab bo‘lgan. Bu haqda zavod mas’uli Shuhrat Arziyev OAV vakillari bilan muloqotda ma’lum qilgan.

Foto: Ravshan Rahmonov

“Oldin 22 kun ishlab, 8 kun dam olardik. Endilikda karantinni sabab qilib ko‘rsatishib, 45 kun ishlatishmoqda. Dam olish kunimiz esa 8 kunligicha qolgan. Ba’zi ishchilarning ish kuni 50 kunga ham cho‘zilib ketyapti. Koronavirusga test topshirib, zavodga kirganimiz uchunmi 45 kun ishlatishmasa, uyga qo‘yib yuborishmayapti. Bu esa biz ishchilar uchun og‘ir bo‘lyapti”, — deydi zavod ishchisi Oybek Sherbo‘tayev.

Shuhrat Arziyevning aniqlik kiritishicha, 21-oktabrdagi to‘polonda zavodning 400 dan ortiq ishchisi ishtirok etgan.

“Daryo”ning Telegram’dagi manziliga shikoyat yo‘llagan murojaatchiga ko‘ra, zavod ishchilarining noroziligiga yotoqxonada ishchilar uchun joy yo‘qligi, uch oydan buyon maosh to‘lanmayotgani va boshliqlar ishchilariga qo‘pol munosabatda bo‘layotgani ham sabab bo‘lgan.

Eslatib o‘tamiz, 21-oktabr kuni ijtimoiy tarmoqlar va Telegram kanallarda Enter Engineering kompaniyasining Qashqadaryo viloyati G‘uzor tumanidagi obyektlaridan biridagi ishchilarning noroziligi aks etgan videoyozuvlar tarqaldi. Bunga izoh bergan kompaniya rahbariyati ishchilarining ommaviy noroziligiga nonushta o‘z vaqtida berilmagani sabab bo‘lganini ma’lum qildi. Keyinchalik Energetika vazirligi Uzbekistan GTL’dagi vaziyat barqarorlashganini, barcha muammo va masalalar joyida ijobiy hal etilganini xabar qildi.