Италия терма жамоаси сентябрь ва октябрь ойларида 2026 йилги Жаҳон чемпионати саралаш босқичи доирасида Исроил билан ўйин ўтказиши кутилмоқда. Шу муносабат билан Италия мураббийлари ассоциацияси мамлакат футбол федерацияси президенти Габриэль Гравина номига мурожаат қилиб, ундан Халқаро футбол федерацияси (FIFA) ва Европа футбол ассоциациялари иттифоқи (УЕФА)га расмий сўров юборишни талаб қилди. Унда Исроил терма жамоасини вақтинча халқаро мусобақалардан четлатиш сўралмоқда. Бу ҳақда ANSA агентлиги хабар берди.
Бундай мурожаатнинг сабаби сифатида Ғазо секторидаги вазият кўрсатилди. Ассоциация президенти Рензо Уливейри ҳолат ҳақида шундай деди:
Инсоний қадриятлар бизни зулм ва унинг оғир оқибатларига қарши қатъий туришга чақиради. Фақатгина ўз манфаатимизни ўйлаб, вазиятни бефарқ қолдириш эса адолатга зид.
Ассоциация вице-президенти Жанкарло Камолезе эса қўшимча қилди:
Жуда кўп бегуноҳ инсонлар ҳаётдан кўз юмди. Уларнинг орасида спортчилар ҳам бор. Бу эса халқаро даражада чора кўриш учун яна бир сабабдир.
Маълумот учун, Италия ва Исроил терма жамоалари 2026 йилги Жаҳон чемпионати саралаш босқичида бир гуруҳда иштирок этмоқда. Томонлар 8-сентябрь куни Венгрияда (нейтрал майдон), 14-октябрда эса Италия шаҳри Удинеда ўзаро ўйин ўтказади. 3-турдан кейин Исроил терма жамоаси 6 очко билан гуруҳда иккинчи ўринда бормоқда. Италия эса икки учрашувдан сўнг 3 очко жамғариб, учинчи поғонада турибди.
Изоҳ (0)