Муддатли ҳарбий хизматни ўтаб, қўмондонлик тавсияномасини олган бўлса-да, ОТМга кириш имтиҳонларида бу имтиёзлари ҳисобга олинмаган абитуриентлар 22 октябрь куни яна Давлат тест маркази олдига йиғилгани ва уларнинг муаммоси «3-4 кунда ҳал этилиши» тўғрисида хабар берилганди. ДТМ матбуот хизматининг ёзишича, ҳарбий тавсияномага эга абитуриентлар масаласи ҳозирда ижобий ҳал этилган.
Эслатиб ўтамиз, 2020 йил ҳарбий қисм қўмондонлиги тавсияномасига эга жами 13 107 нафар абитуриент олий таълим муассасаларининг бакалавриат таълим йўналишларига ўқишга кириш учун рўйхатдан ўтган бўлиб, масъул ваколатли органлар томонидан дастлабки текшириш натижаларига кўра, 1828 нафар абитуриентнинг ҳарбий қисм қўмондонлиги тавсияномаси тасдиқланмаганди.
«Масъул ваколатли органлар ҳамда тегишли вазирлик ва идоралар билан қайта текшириш натижаларига кўра, 1828 нафар абитуриентдан 1516 нафари ҳарбий қисм қўмондонлиги тавсияномасига эга эканлиги, 172 нафари сафарбарлик чақирув резервида хизмат қилганлиги, 85 нафари ҳарбий хизматни ўтамаганлиги ва 55 нафари муддатли ҳарбий хизматни ўтаганлиги, лекин ҳарбий қисм қўмондонлиги тавсияномасига эга эмаслиги аниқланди», — дейилади хабарда.
Маълум қилинишича, ДТМ томонидан тавсияномаси тасдиқланган абитуриентларнинг тест синовида тўплаган баллари асосида танлов натижалари (ҳар бир таълим шакли ва олий таълим муассасаси кесимида) ҳисобланганда 1516 нафар абитуриентдан 128 нафари давлат грантига, 478 нафари тўлов-контрактга ўтиш балларига тенг ёки ундан юқори (рўйхатдан ўтишда танланган 1-олий таълим муассасасида имтиёз доирасида ўтиш балига нисбатан) балл тўплаганлиги маълум бўлган.
Ушбу масала Ўзбекистон таълим муассасаларига ўқишга қабул қилиш бўйича Давлат комиссиясининг навбатдаги мажлисида кўриб чиқилиб, тегишли вазирлик ва идоралар билан келишилган ҳолда абитуриентларнинг ҳуқуқларини ҳимоя қилиш мақсадида Давлат комиссиясининг 6-сон баёни билан мазкур абитуриентларнинг 128 нафари давлат гранти асосида, 478 нафари эса тўлов-контракт асосида талабаликка тавсия этилган.
«Ҳозирда талабаликка тавсия этилган абитуриентларнинг қайдномаси олий таълим муассасаларига тақдим этилмоқда. Талабаликка тавсия этилган абитуриентлар ўз натижаларини шахсий кабинетлари (abitur.dtm.uz) орқали кўришлари мумкин», — дейилади хабарда.
Эслатиб ўтамиз, 5 октябрь куни Тошкент шаҳридаги Давлат тест маркази биносига ҳарбий тавсияномаси бўла туриб, лекин имтиёз қўлланилмаган абитуриентлар тўплангани хабар қилинганди. Унда бир қанча абитуриентлар ва уларнинг ота-оналари ушбу вазият бўйича ДТМдан изоҳ талаб қилиб, бу масалани ҳал қилишни талаб қилишган. Лекин ДТМ вакили бу муаммони ҳал қилиш марказнинг ваколати доирасида эмаслигини билдириб ўтган эди. Кейинроқ ДТМ ҳарбий тавсияномалари бўлган мурожаатчилар рўйхати қайта кўриб чиқилишини билдирган.
Изоҳ (0)