Тошкент вилояти Чирчиқ шаҳрида поезд вагони устида селфига тушмоқчи бўлган 14 ёшли йигит юқори кучланишли ток уриши оқибатида оғир тан жароҳати олди. Бу ҳақда «Севимли» телеканалининг «Замон» информацион дастурида маълум қилинди.
Маълумотларга кўра, 12 октябрь куни соат 14:20 ларда тўрт нафар вояга етмаган мактаб ўқувчиси поезд вагони устида суратга тушиш бўйича ўзаро гаров боғлаган. Улар «Чирчиқ темир йўл бекати»га келган ва поезд вагони устига биринчи бўлиб чиққан 14 ёшли Русланни темир йўл устига ўрнатилган юқори кучланишдаги электр токи урган.
Маълум қилинишича, Руслан селфига тушиш мақсадида қўлидаги телефонини юқорига кўтарган вақтида 27 минг волт кучланишга эга электр симларига тегиб кетган. У йиқилиб тушган ва ёна бошлаган. Ҳозирда у шифохонада оғир аҳволда ётмоқда.
Аввалроқ Самарқандда юк поезди қулоқчин таққан йигитни уриб кетмаслик учун фавқулодда тўхташни амалга оширган, шунингдек, Самарқандда темир йўл релсига тош қўйиб қўйган 40 ёшли эркак қўлга олингани тўғрисида хабар берилганди.
Изоҳ (0)