Сирдарё ва Қашқадарёда ҳайдовчиларнинг телефонларини олиб қўйган ЙПХ инспекторларига нисбатан хизмат текшируви тайинланди

Сирдарё ва Қашқадарё вилоятларида ҳайдовчилар билан юзага келган келишмовчилик сабабли уларнинг мобил телефонларини олиб қўйган ЙПХ инспекторларига нисбатан хизмат текшируви тайинланди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.

Маълум қилинишича, Сирдарё вилояти ИИБ ЙҲХБ ЙПХ инспектори сафдор Б.Бобожонов 2020 йил 7 октябрь куни соат 15:40 да Сирдарё тумани ҳудудидан ўтган М-34 автомобиль йўлининг 90-километрида хизмат олиб бораётган вақтида товуш кучайтиргич (сирена) мосламасини ёқиб келганликда гумон қилиб, Lacetti автомобилини тўхтатган.

Шундан сўнг ҳайдовчи ва ЙПХ инспектори ўртасида келишмовчилик юзага келган. Ҳолатга ҳайдовчининг яқинлари ҳам аралашган ва шахсий уяли алоқа воситаси ёрдамида тасвирга олган. Видеода сафдор Б.Бобожонов йигитларнинг тасвирга олишига қаршилик қилиб, уяли телефонларини олиб қўйганлиги акс этган.

Ҳозирда мазкур ҳолат юзасидан Сирдарё вилояти ИИБ ЙҲХБ томонидан хизмат текшируви тайинланган.

Хабар берилишича, Қашқадарё вилояти ИИБ ЙҲХБ ЙПХ инспектори сержант Ж.Қосимов Қарши шаҳар Б.Шерқулов кўчасида хизмат олиб бораётган вақтида Nexia-3 автомобили ҳайдовчисини спиртли ичимлик истеъмол қилган ёки қилмаганлиги аниқлаш мақсадида тўхтатган.

Шунда ҳайдовчи шахсий уяли алоқа воситаси орқали ҳолатни тасвирга олиб, сержант Ж.Қосимовдан дислокациясини тақдим этишини сўраганида сержант Ж.Қосимов дислокацияси йўқлигини айтган. Ҳайдовчи хизмат гувоҳномасини тақдим этишини сўраган вақтда сержант Ж.Қосимов хизмат гувоҳномасини тақдим қилишини, бироқ ҳайдовчини уни тасвирга олишга ҳаққи йўқлигини билдирган. Шундан сўнг шу ерда хизмат олиб бораётган ЙПХ инспектори сафдор Б.Шоғдоров ҳайдовчига ўзини таништириб, хизмат гувоҳномасини тақдим этган ва шу вақтда ҳайдовчидан уяли телефони олиб қўйилган.

Бу жараёнда ЙПХ инспекторлари хизмат вазифаларини бажаришда қатор камчиликларга йўл қўйгани акс этган. Мазкур ҳолат юзасидан Қашқадарё вилояти ИИБ ЙҲХБ томонидан хизмат текшируви тайинланган.