Деҳқонободлик тадбиркор Қарши аҳолисини арзон гўшт билан таъминлашга ваъда берди

Қашқадарё вилоятининг Деҳқонобод туманида фаолият юритувчи тадбиркор Бекзод Бердиев Қарши шаҳри аҳолисини арзонлаштирилган гўшт билан таъминлашга ваъда берди. Вилоят ҳокими эса бу ташаббусни олқишлаб, тадбиркорга 1 миллиард сўм фоизсиз кредит берилишини маълум қилган. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.

Таъкидланишича, 2020 йил 20 октябрь куни Халқ депутатлари Қашқадарё вилояти кенгашининг навбатдаги сессияси бўлиб ўтган.

Унда сўз олган вилоят раҳбари Зоир Мирзаев депутатларга юзланиб, озиқ-овқат омборлари эшикларини очиш вақти келганини таъкидлаган ва «... айрим озиқ-овқат маҳсулотларида нарх-наво қимматлашиб кетмоқда. Озиқ-овқат захираси етарли, аммо, у бозорда эмас, ‘уддабурон’ тадбиркорларнинг омборхоналарида. Агар депутатларимиз ҳам бизга кўмаклашса, шундагина омборхоналар эшигини очамиз. Халқни вакили сифатида уларни манфаатлари учун озроқ ўзимизни қийнашимиз керак», деган.

Вилоят ҳокими чорвачилик учун берилаётган миллиардлаб кредитлар натижа бермаётганини танқид қилиб, виждонли тадбиркорлар арзонлаштирилган гўшт етказиб бермаса, вилоятда гўшт нархи 100 минг сўмга чиқиб кетиши мумкинлигини айтган.

«Косон, Чироқчи ва Ғузор ҳокимликларига раҳмат. Қарши шаҳридаги бозорларга ярмарка нархида гўшт етказиб бермоқда. Шу тартиб ўйлаб чиқилмаганида, гўшт нархи 100 минг сўмга чиқиб кетар эди», — деган ҳоким.

Вилоят раҳбарини ташвишлантирган муаммога жавоб берган деҳқонободлик тадбиркор Бекзод Бердиев Қарши шаҳри аҳолисини килоси 55 минг сўм бўлган арзонлаштирилган гўшт билан таъминлаш масъулиятини ўз зиммасига олган. Зоир Мирзаев эса тадбиркорнинг ташаббусини олқишлаб, унга вилоят ҳокимлиги ҳузурида озиқ-овқат хавфсизлигини таъминлаш ва ички бозорда нарх-наво барқарорлигини сақлаш мақсадида бюджети 24 миллиард сўмлик бўлган жамғарма ҳисобидан тадбиркорга фоизсиз 1 миллиард сўм кредит берилишини маълум қилган.