Sirdaryo va Qashqadaryo viloyatlarida haydovchilar bilan yuzaga kelgan kelishmovchilik sababli ularning mobil telefonlarini olib qo‘ygan YPX inspektorlariga nisbatan xizmat tekshiruvi tayinlandi. Bu haqda Ichki ishlar vazirligi Yo‘l harakati xavfsizligi bosh boshqarmasi xabar berdi.
Ma’lum qilinishicha, Sirdaryo viloyati IIB YHXB YPX inspektori safdor B.Bobojonov 2020-yil 7-oktabr kuni soat 15:40 da Sirdaryo tumani hududidan o‘tgan M-34 avtomobil yo‘lining 90-kilometrida xizmat olib borayotgan vaqtida tovush kuchaytirgich (sirena) moslamasini yoqib kelganlikda gumon qilib, Lacetti avtomobilini to‘xtatgan.
Shundan so‘ng haydovchi va YPX inspektori o‘rtasida kelishmovchilik yuzaga kelgan. Holatga haydovchining yaqinlari ham aralashgan va shaxsiy uyali aloqa vositasi yordamida tasvirga olgan. Videoda safdor B.Bobojonov yigitlarning tasvirga olishiga qarshilik qilib, uyali telefonlarini olib qo‘yganligi aks etgan.
Hozirda mazkur holat yuzasidan Sirdaryo viloyati IIB YHXB tomonidan xizmat tekshiruvi tayinlangan.
Xabar berilishicha, Qashqadaryo viloyati IIB YHXB YPX inspektori serjant J.Qosimov Qarshi shahar B.Sherqulov ko‘chasida xizmat olib borayotgan vaqtida Nexia-3 avtomobili haydovchisini spirtli ichimlik iste’mol qilgan yoki qilmaganligi aniqlash maqsadida to‘xtatgan.
Shunda haydovchi shaxsiy uyali aloqa vositasi orqali holatni tasvirga olib, serjant J.Qosimovdan dislokatsiyasini taqdim etishini so‘raganida serjant J.Qosimov dislokatsiyasi yo‘qligini aytgan. Haydovchi xizmat guvohnomasini taqdim etishini so‘ragan vaqtda serjant J.Qosimov xizmat guvohnomasini taqdim qilishini, biroq haydovchini uni tasvirga olishga haqqi yo‘qligini bildirgan. Shundan so‘ng shu yerda xizmat olib borayotgan YPX inspektori safdor B.Shog‘dorov haydovchiga o‘zini tanishtirib, xizmat guvohnomasini taqdim etgan va shu vaqtda haydovchidan uyali telefoni olib qo‘yilgan.
Bu jarayonda YPX inspektorlari xizmat vazifalarini bajarishda qator kamchiliklarga yo‘l qo‘ygani aks etgan. Mazkur holat yuzasidan Qashqadaryo viloyati IIB YHXB tomonidan xizmat tekshiruvi tayinlangan.
Mavzuga doir:
- Ohangaronda to‘xtatilgan haydovchiga “masxarabozlik qilgan” YPX xodimi lavozimidan ozod qilindi
- Navoiyda haydovchining soqol qo‘yganiga e’tiroz bildirgan YPX xodimi ustidan xizmat tekshiruvi boshlandi
- Toshkentda bir fuqaroning IIB xodimlari tomonidan qo‘lga olinayotgani aks etgan video bo‘yicha izoh berildi
- Chilonzorda 13 yoshli bolaga kuch ishlatgan IIB xodimlari jazolandi
Izoh (0)