Сенат ички ишлар органлари жамоатчилик ва ОАВ билан ўзаро ҳамкорлик меморандумини тасдиқлаши зарурлигини белгилади

21 октябрь куни Сенатнинг саккизинчи ялпи мажлисида Ички ишлар вазирлиги ва Бош прокуратурага парламент сўрови юбориш тўғрисидаги қарори натижалари кўриб чиқилди.

Жумладан, Ички ишлар вазирлиги томонидан қарор ижросини таъминлаш доирасида Бирлашган Миллатлар Ташкилотининг 1984 йилдаги конвенцияси ва Жиноят-процессуал кодексга қатъий амал қилиш бўйича янги тартиб йўлга қўйилгани билдирилди. Ички ишлар органларининг 468 та маъмурий биноси, 91 та вақтинча сақлаш ҳибсхонаси, 13 та махсус қабулхона, 12 та реабилитация маркази, 43 та жазони ижро этиш муассасаси, 11 та тергов ҳибсхонасида жами 9 547 та кузатув камераси ўрнатилгани маълум қилинди.

Мажлисда сенаторлар ИИВ ва Бош прокуратура айрим муаммоли масалаларни бартараф этиш чораларини кўриши кераклигини таъкидлади.

Хусусан, ИИВ бир ой муддатда БМТ конвенцияси ва Республика Жиноят-процессуал кодексига қатъий амал қилиш бўйича чора-тадбирларни ишлаб чиқиш, ички ишлар органлари фаолиятининг очиқлигини таъминлаш учун жамоатчилик ва ОАВ билан ўзаро ҳамкорлик меморандумини тасдиқлаш зарурлиги белгиланди.

Шунингдек, Бош прокуратура ва Олий Мажлиснинг Инсон ҳуқуқлари бўйича вакили (Омбудсман) билан ҳамкорликда тергов ҳибсхоналари, озодликдан маҳрум этиш жойлари ва шахслар турган, ўз ихтиёри билан чиқиб кета олмайдиган бошқа жойларда хизмат олиб борувчи ходимларининг қийноққа солиш, шафқатсиз ва ғайриинсоний ёки қадр-қимматни камситувчи хатти-ҳаракатларининг барвақт олдини олиш 2021 йилга мўлжалланган қисқа муддатли ўқув дастури ишлаб чиқиш таъкидланди.

2021 йил якунига қадар барча ҳудудий тергов бўлинмаларида сўроқ жараёнини стенография қилиш, видеокузатув, тергов ҳаракатларини аудио ва видео қайд этиш тизимлари билан жиҳозланган махсус тергов хоналари ташкил этиш зарурлиги тасдиқланди.

Масала юзасидан Олий Мажлис Сенатининг тегишли қарори қабул қилинди.

Эслатиб ўтамиз, аввалроқ Ўзбекистонда Қийноқнинг олдини олиш қўмитаси ташкил этилиши кўзда тутилаётгани, қўмита ҳуқуқни муҳофаза қилувчи алоҳида орган, яъни инсоннинг қийноқдан ҳимоя қилишга доир конституциявий ҳуқуқини таъминлаш бўйича республика давлат бошқаруви органи сифатида ўз ваколатларини мустақил ҳамда давлат органлари, уларнинг мансабдор шахсларига тобе бўлмаган тарзда амалга ошириши, ўз фаолиятида Республика Президенти ва Олий Мажлиси палаталарига ҳисобдор бўлиши белгиланиши айтилган.