Беларусь мухолифатининг етакчиси Светлана Тихановская беларуслардан 26 октябрда ишга, ўқишга чиқмасликни сўради ва халқ қўзғолонини қўллаб-қувватлаганлар учун кафил бўлишга тайёрлигини билдирди. Тихановскаянинг матбуот хизмати унинг 26 октябрда халққа ушбу мавзуда мурожаат қилиши ҳақида хабар берди.
«26 октябрда ишга ёки ўқишга борманг — бу норозилик намойиши. Майдонларга чиқиш — бу ҳам қўзғолон. Идора ва офисларинингизни ёпинг – бу ҳам норозилик ифодаси. Давлат хизматлари ва сервисларидан фойдаланишни тўхтатинг – бу ҳам ғалаён. Банкдаги ҳисоб рақамингизда турган пулларни ечиб олинг – бу ҳам исён. Жим турманг», — дейилади хабарда.
Тихановская норозилик билдирган фуқаролар иқтисодий зўравонликка учраса ёки ишдан бўшатилса, уларга BySol фондидан маблағ ажратилиши ҳақида ваъда берган.
«Умуммиллий қўзғолонга қўшилган ҳар бир беларусга кўмак бераман. Бу ишчиларнинг масъулияти талабалар, тадбиркорлар, тумандаги қўшнилар, ҳайдовчилар, олимлар ёки нафақахўрларга ҳам тақсимланишини англатади», – деган Беларусь мухолифати етакчиси.
Шунингдек, Тихановская ҳукумат тепасига келадиган бўлса, коммунал тўловлар учун жорий қилинган барча жарималар бекор қилиниши, судланганлар оқланиши ва маъмурий жарималар бекор бўлиши, иш жойини йўқотганлар лавозимига қайта тикланиши, шунингдек, ишда тўловлар сабаб ушлаб турилганларга молиявий амнистиялар берилишини айтмоқда.
Эслатиб ўтамиз, Беларусда 9 август куни бўлиб ўтган сайловларни сохталаштириш ҳақидаги маълумотлар фонида норозилик намойишлари бошланди ва ҳалигача давом этмоқда. Намойишчилар Лукашенкони сайлов натижаларини сохталаштиришда айбламоқда. Сайлов натижаларига кўра, Александр Лукашенко 80 фоиз овоз тўплаган.
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади. Сайловдан икки кун ўтгач Тихановская Литвага чиқиб кетган. Унинг сафдошлари Тихановская ҳукумат босими остида мамлакатдан чиқиб кетганини маълум қилган.
Собиқ президентликка номзод Светлана Тихановскаянинг тарафдорлари 18 август куни янги сайловлар ўтказиш орқали мамлакатда ҳокимиятни транзит қилиш мақсадида Мувофиқлаштирувчи кенгаш тузди. Беларусь бош прокурори Александр Конюкнинг таъкидлашича, Мувофиқлаштирувчи кенгаш фаолияти конституцияга қарши ва ҳокимиятни қўлга олишга қаратилган.
Кенгашнинг ташкил этилиши муносабати билан Жиноят кодексининг 361-моддаси билан жиноят иши қўзғатилиб, унинг доирасида Мувофиқлаштирувчи кенгашнинг бир нечта вакиллари ҳибсга олинган.
Беларусь президенти Александр Лукашенко 10 октябрь куни Давлат хавфсизлик қўмитаси тергов ҳибсхонасида Мувофиқлаштирувчи кенгаш ва мухолифатнинг қўшма штабининг ҳибсга олинган вакиллари билан учрашди. Кейинчалик Беларусь ҳукумати Светлана ва Сергей Тихановскийга 134 кун ичида биринчи марта суҳбатлашишига рухсат этди, 13 октябрда Тихановскаянинг Беларусь ҳукуматига «халқ ультиматум»ини эълон қилгани ҳақида хабар берилди. Мухолифат етакчиси амалдаги президентга ўйлаб кўриш учун 25 октябргача муҳлат берган. Агар Лукашенко ўз лавозимини тарк этмаса, 26 октябрь куни мамлакатда халқ қўзғолони кўтарилади ва ҳукуматга қарши ҳаракатлар бошланади.
Изоҳ (0)