Қўлқоп тақиш коронавирус тарқалишига қарши самарасиз чорага айланмоқда. «Интерфакс»нинг хабар беришича, бу ҳақда Россия бош инфекционисти Владимир Чуланов маълум қилди.
«Вирус, асосан, (90 фоиз) ҳаво томчилари орқали юқади ва фақат 10 фоиз ҳолатдагина контакт йўли билан, яъни вирус қолган жойга қўл билан тегиш ва уни кўз, оғизга теккизиш орқали юқади. Ушбу 10 фоиз муҳим рол ўйнамайди. Менинг назаримда, коронавируснинг контакт йўл билан юқишининг олдини олишда энг самарали усул бу жамоат транспортига кириш-чиқишда қўлни антисептик воситалар билан артишдир», — деган Владимир Чуланов.
Унинг айтишича, «агар ҳамма транспортга кириш-чиқишда қўлларни антисептик воситалар билан артганида, шунинг ўзи етарли ва эҳтимол қўлқопларга қараганда самаралироқ бўларди. Чунки уни тўғри тақиш, утилизация қилиш керак, буни эса ҳамма ҳам билмайди».
«Кимдир уни яна тақиш учун чўнтагига солиб қўяди. Бу инфекция юқтириш борасида қўшимча хавф пайдо қилади. Агар ҳамма тўғри фойдаланганида — юзга теккизмасдан тақиб, юзасига тегмасдан ечганларида ва махсус чиқинди контейнерларига утилизация қилганларида эди, бу идеал бўларди, лекин ҳамма ҳам бундай қилмайди.
Инфекционист, шунингдек, айримлар қўлқопларни ташлаб юбормасдан узоқ вақт тақаётганини, бу уларни ҳеч нимадан ҳимоя қилмаслигини, аксинча хавф пайдо қилишини ҳам айтиб ўтган.
Унинг фикрича, «қўлқоплар тақиш — ортиқча чора». Шу билан бирга ниқоб тақиш муҳим эканлиги, буни ҳамма истисносиз амалга ошириши лозимлиги, шунингдек, қўлларни антисептик билан зарарсизлантириш кераклиги, шундагина эпидемик вазиятни тўхтатиш мумкинлигини таъкидлаган.
Эслатиб ўтамиз, Тошкентда ҳам турли юқумли мавсумий инфекциялар тарқалишининг олдини олиш ва йўловчилар саломатлигини асраш мақсадида 19 октябрдан бошлаб жамоат транспорти (автобус, метро, йўналишли такси) хизматидан фойдаланганда йўловчиларнинг тиббий ниқоб ва қўлқопда бўлиш тартиби жорий этилди. Улар йўловчиларга бепул тақдим этилади. Тарқатиладиган тиббий қўлқоплар транспорт корхоналари ҳисобидан, яъни давлат томонидан қопланади.
ЖССТ «Қўлқоп тақиш керакми?», деган саволга «Йўқ, сизни COVID-19’дан резина қўлқопдан кўра, қўлларни совунлаб ювиш яхшироқ ҳимоя қилади» деб жавоб берганди. Алоҳида экспертлар ҳам ушбу фикрни маъқуллаган.
Изоҳ (0)