Бразилиянинг Саломатлик бўйича назорат миллий агентлиги Anvisa Буюк Британиянинг AstraZeneca компанияси томонидан яратилган коронавирусга қарши вакцина синовида иштирок этаётган кўнгилли вафот этганини маълум қилди, деб ёзмоқда «РИА Новости».
Хабар берилишича, назорат органининг баёноти G1 портали томонидан эълон қилинган.
Баёнотда «этика ва махфийлик нуқтаи назаридан» ўлимнинг сабаби ошкор қилинмаган, шунингдек, кўнгилли плацебони ёки фаол вакцинани қабул қилгани ҳақида маълумот берилмаган.
AstraZeneca компанияси эса ҳозирча вакцинани синовдан ўтказаётган кишининг ўлими бўйича расмий маълумотга эга эмаслигини ва ҳозирги мавжуд маълумотга изоҳ бермаслигини маълум қилган.
Anvisa томонидан берилган маълумотга кўра, вакциналар синовлари хавфсизлигини баҳолаш бўйича халқаро қўмита синовларни давом эттиришни тавсия қилган.
Аввалроқ AstraZeneca беморларнинг бирида иккиламчи таъсир пайдо бўлгани сабабли коронавирусга қарши вакцинанинг АҚШда ўтказилаётган учинчи фаза синовларини тўхтатиб қўйганди. Кейинроқ компания Буюк Британиянинг Дори воситалари ва соғлиқни сақлаш бошқармасининг синовларни давом эттиришнинг хавфсизлиги тўғрисида тасдиғини олди ва синовларни қайта бошлади.
Кейинчалик америкалик олимлар AstraZeneca ва Оксфорд университети ҳамкорлигида яратилган коронавирусга қарши вакцина синовларида иштирок этувчиларда аниқланган ножўя таъсирлари тўғрисидаги ҳисоботларида тафовут борлигини аниқлади ва компаниядан вакцинадан сўнг пайдо бўлган ноодатий аломатларни ошкор қилишни талаб қилди.
Маълумот учун, Буюк Британиянинг Оксфорд университети AstraZeneca компанияси билан биргаликда ЧАдОх1 нCов-19 вектор вакцинасини яратган. Клиник синовларнинг биринчи ва иккинчи фазалари 2020 йилнинг апрелида бошланган. Вакцинанинг асосини одамларда хавф туғдирмайдиган шимпанзеларда шамоллашни қўзғатувчи вирус ташкил этади. Шу билан бирга, инсон организми уни COVID-19 коронавируси сифатида қабул қилмоқда.
Синовларда 18-55 ёш оралиғидаги 1077 нафар соғлом британиялик иштирок этган. Номзод вакцинадан ташқари, кўнгиллиларга плацебо юборилган. Олимлар тадқиқотларнинг дастлабки иккита фазаси натижаларини The Lancet журналида эълон қилган. Мақолада таъкидланишича, вакцина 14 кун давомида организмнинг соғлом ҳужайраларини зарарли вирус ҳужайраларига ҳужум қилишга ундаган. Антитаналар вирусни 28 кун ичида зарарсизлантирган.
Олимларнинг маълум қилишича, синовдан ўтказилган вакцинанинг жиддий салбий таъсири кузатилмаган. Салбий таъсирлар орасидан инъекция юборилган жойда оғриқ, қизариш, шишиш, қичишиш, шунингдек, мушаклар оғриғи, аралаш оғриқлар, чарчоқ, кўнгил айниши, бош оғриғи, титроқ ва иситма чиқиши ўрин олган.
Оксфорд университети 20 июнь куни клиник синовларнинг учинчи фазасини бошлаган. Тадқиқотлар бир вақтнинг ўзида Буюк Британия, Жанубий Африка ва Бразилияда ўтказилмоқда. Вакцина 8 мингдан ортиқ кўнгиллида синовдан ўтказилиши маълум қилинган. Синовларнинг учинчи фазаси дастлабки иккитасининг алгоритмини такрорлайди ва июль ойи охирларида якунланиши кераклиги хабар қилинганди.
Изоҳ (0)