2018 йилда ўлдирилган Washington Post журналисти Жамол Қошиқчининг қайлиғи Ҳадича Ченгиз Саудия Арабистони валиаҳд шаҳзодаси Муҳаммад бин Салмонни судга берди. Бу ҳақда The New York Times’га таяниб, Meduza хабар берди.
Даъво аризасида Ҳадича Ченгиз ва Democracy for the Arab World Now (DAWN) ташкилотидан бўлган инсон ҳуқуқларини ҳимоя қилиш фаоллари шаҳзодани журналистни ўлдириш ҳақидаги буйруқ берганликда айбламоқда ва ундан товон пули талаб қилмоқда. Аризада, шунингдек, Ченгиз ва DAWN Жамол Қошиқчининг ўлдирилишига алоқадор деб ҳисоблаган Ар-Риёднинг 20 нафар расмийлари ҳам келтирилган.
Саудия Арабистонининг Вашингтондаги элчихонаси вакили The New York Times газетасининг сўровига жавоб бермаган.
Эслатиб ўтамиз, Жамол Қошиқчи The Washington Post журналисти бўлган ва ўз мақолаларида Саудия Арабистони ҳукуматини танқид қилган. У 2018 йилнинг октябрь ойида Саудия Арабистонининг Истанбулдаги элчихонасида ўлдирилган. Унинг жасади ҳозиргача топилмаган.
Туркия ҳукумати, АҚШ Сенати ва Марказий разведка бошқармаси журналистни ўлдириш ҳақидаги буйруқни Саудия Арабистонининг меросхўр шаҳзодаси Муҳаммад бин Салмон берганлигини маълум қилган. Саудия Арабистони ҳукумати эса журналистнинг ўлимини куч тузилмаларининг шахсий ташаббуси деб атаган.
Жиноятда гумонланганлар Саудия Арабистони судига топширилган. 2019 йилнинг декабрь ойида уларнинг беш нафари ўлим жазосига ҳукм қилинган, яна уч нафарига тайинланган қамоқ жазосининг умумий муддати 24 йилни ташкил этган.
2020 йилнинг сентябрида беш кишига тайинланган ўлим жазоси журналистнинг ўғиллари сўровига асосан қамоқ жазосига алмаштирилган. 2020 йилнинг май ойида журналистнинг ўғиллари отасининг ўлимида айбдор бўлганларни кечиришини маълум қилган. Бироқ журналистнинг дўсти Қошиқчининг ўғиллари айбдорларни кечириш ҳақида ўз ихтиёри билан маълум қилганига шубҳа билдирган.
Изоҳ (0)