Канаданинг Альберта провинциясида 12 ёшли Натан Грушкин томонидан 50 та суякдан иборат динозавр скелети топиб олинди. Болакай, тахминан, 69 миллион йиллик топилмани 2020 йил июль ойида уюштирилган сайрларнинг бирида топишга муваффақ бўлди. Шунингдек, динозавр қолдиқларини қазиш ишлари якунланди, деб ёзади «Korrespondent.net».
Таъкидланишича, Натан олти ёшидаёқ динозаврлар мавзусига тегишли бўлган нарсаларга қизиқа бошлаган. Бундан ташқари, у кўпинча отаси билан биргаликда Альбертадаги қўриқхонага сайр қилишга борар эди. Бир йил аввал улар суяк парчаларига ўхшаш майда қолдиқларга дуч келди ва ушбу ёзда ўша жойга қайтадан бориб, уларни яқиндан текшириб кўрди.
«Аслида ушбу суяк қолдиқларини топишга муваффақ бўлганимдан жуда ҳам ҳайратдаман. Худди бизникига ўхшаш бўлган динозавр суяклари қандай қилиб қаттиқ тошларга айланиши мени доим ўйлантириб келган», − дейди Натан.
Грушкинлар оиласи Альберта шаҳрида жойлашган Тирелл Қироллик музейига мурожаат қилган, шундан сўнг топилма жойига мутахассислар юборилган.
Изоҳ (0)