Meksikalik erkak to‘fon vaqtida 300 ga yaqin boshpanasiz hayvonni o‘z uyiga joylashtirdi

Meksikadagi Tierra de Animales nomli boshpanasiz hayvonlarni saqlash tashkilotida ishlaydigan Rikardo Pimental ismli erkak to‘fon paytida o‘z uyida 300 ta jonzotni yashirdi, deb yozadi Bored Panda nashri.

Odatdagi vaqtda boshpanasiz hayvonlar saqlanadigan tashkilot binosi o‘z vazifasini bemalol bajara oladi, biroq 5-oktabr kuni mamlakatga “Delta” to‘foni yopirilgan.

Pimental barcha hayvonlar binoga sig‘masligini anglab, ularni o‘z uyida himoya qilishga qaror qilgan.

Natijada uning uyida itlar, mushuklar, echki va tovuqlardan iborat katta kompaniya yig‘ilgan. U jami 300 ga yaqin jonzotni “taklif etgan”.

“Ular kechasi o‘zini juda yaxshi tutdi. Hayvonlarning barchasi sterillangan, emlangan va degelmintizatsiya qilingan. Ularning barchasi yangi oilasiga borish uchun tayyor”, — deydi Pimental.

Erkakning so‘zlariga ko‘ra, to‘fondan so‘ng tashkilotga yanada ko‘proq xayriya zarur bo‘ladi, chunki ular kattaroq boshpana qurishni rejalashtirmoqda.

“Men hayvonlar hayotini yoshligimdan saqlab kelgan, to‘qqiz yil oldin esa Tierra de Animales’ga asos soldim. Biz nafaqat itlarni, balki mushuklar, toshbaqalar, iguana, sigir, qo‘y, echki, cho‘chqa, ot, eshaklarni ham qutqaramiz”, — deydi erkak.

5-oktabr kuni yopirilgan “Delta” to‘foni 12-oktabrga qadar davom etgan. Ta’kidlanishicha, uning tezligi soatiga 230 kilometrga yetgan.