Австралияга кўчиб ўтган малайзиялик аёл ўзининг турмуши сақлаб қолингани учун коронавирус пандемиясига миннатдорлик билдирди, деб хабар беради АsiаOne.
Пандемия бошлангунига қадар Мелбурнда истиқомат қилган аёл турмуш ўртоғи билан ажрашиш, офисига яқин жойдан квартира ижарага олиб, ўғлини ёлғиз тарбиялашни ўйлаган. Бунга эрининг мунтазам ишдан кеч келиши ва уйдаги муаммоларни ҳал этмаслиги ёки фарзандининг тарбиясида иштирок этмаслиги сабаб бўлган. Аёл турмуш ўртоғи билан 12 йилдан бери бирга яшайди.
Коронавирус пандемияси сабаб юзага келган қаттиқ карантин чоралари эркакни уйдан туриб ишлашга мажбур қилган. Эркак аёли уч ёшли ўғлига қараш ва уй мажбуриятларини бажаришда нақадар қийналаётганини кўрса-да, уларга ҳеч қандай ёрдам бермаган ва шовқин солмасликни талаб қилган. Қайсидир онда аёл онлайн-дарс ўтиш учун фарзандини эрига топширган, бироқ эркак болага шовқин соладиган ўйинчоқ бериб, ўзи ювинишга кириб кетган. Дарс бузилган.
Афтидан, бу каби ҳолат бир неча маротаба такрорланган. Навбатдаги можародан сўнг аёл уйида жанжал кўтарган ва турмуш ўртоғи билан гаплашмай қўйган. Шундан сўнг эркак ўғлини ҳар куни ўзи ювинтира бошлаган, хотинининг дарси бор вақтларда болага қараган ва тинчлик керак бўлганда уларни олдиндан огоҳлантирган.
Натижада эркак ўғли билан кўпроқ вақт ўтказа бошлаган ва билан дўстлашиб олган. Аёлнинг тан олишича, пандемия бошлангунига қадар у бу ҳақда фақат орзу қилган. Уларнинг оилавий муносабатлари ҳам ўз жойига тушган.
«COVID-19 кўплаб оилаларга айрилиқ ва оғриқларни олиб келди, бироқ шахсан мен оиламни сақлаб қолгани учун ундан миннатдорман», — дейди аёл.
Изоҳ (0)