Ҳақиқий юз минг сўмлик купюрани қалбакисидан қандай ажратиш мумкин?

Ижтимоий тармоқларда тарқалган хабарларга кўра, сохта 100 минг сўмлик пуллар фирибгарлар томонидан қалбакилаштирилган ва муомалага киритилган. Бу ҳақда Бу ҳақда «Ўзбекистон 24» телеканалининг «Факт 24» дастурида маълум қилинди.

Шу муносабат билан мутахассислар ҳақиқий 100 минг сўмликни сохтасидан қандай ажратиш кераклиги ҳақида маълумот бериб ўтди.

Мутахассиснинг таъкидлашича, биринчидан, пулнинг қоғозига эътибор бериш керак. Ҳақиқий купюранинг қоғози сохтасидан кўра юпқароқ бўлади.

Иккинчидан, ҳақиқий купюранинг олд томони чап юқори бурчагида ўзгарувчан рангда 100 000 сони мавжуд. Унга ёруғликнинг турли бурчакларидан қаралганда сонни пушти рангдан тилла ранггача ўзгаришини кузатиш мумкин.

Шунингдек, ҳақиқий купюранинг олд қисмидан қаралганда ўнг тарафда Мирзо Улуғбек ҳайкали бош қисмининг тасвири туширилган бўлади. Пулни ёруғликка йўналтириб қаралганда тасвир купюранинг ичида экани маълум бўлади. Қалбаки пулларда бу тасвир бўлмайди ёки купюранинг ташқи қисмида бўлади.

Шу билан бирга, ушбу купюрани ҳақиқий эканини кўзи ожизлар ҳам текшириш имконияти бор. Яъни купюранинг олд томони ўнг пастки бурчагидаги 100 000 сони қавариқ тарзида ишланган.

Қайд этилишича, нафақат 100 минг сўмлик купюрани, балки АҚШ долларини ҳам сохталаштириш ҳолатлари учраб турибди. Хусусан, Тошкент вилоятида яшовчи фуқаро уй олди-сотдисини АҚШ долларида амалга оширган вақтида пулларнинг ичидаги баъзи купюралар унда шубҳа уйғотади ва у мутахассисларга мурожаат қилади.

Текширувлар натижасида ҳақиқатан ҳам пуллар ичида 3 дона 100 АҚШ доллари сохта экани аниқланган.

Эслатиб ўтамиз, Жиноят кодексининг 176-моддасига кўра, қалбаки банкнотлар металл тангалар, акциз маркалар, шунингдек, қимматли қоғозлар ясаш ва уларни муомалага киритиш ҳолатлари аниқланса, 5 йилгача озодликдан маҳрум қилиниш жазоси қўлланилади.

https://www.youtube.com/watch?v=6NmZaF_gbiA&ab_channel=O%27зМТРКО%27збекистонмиллийтелерадиокомпанияси

Аввалроқ Бухорода салкам 100 минг долларлик қалбаки валютани сотишга уринганлар қўлга олингани хабар қилинганди.