Жиззахда икки Nexia иштирокида содир бўлган ЙТҲ оқибатида ҳайдовчилар вафот этди (фото)

Жиззах вилояти Ғаллаорол туманида икки Nexia иштирокида содир бўлган тўқнашув оқибатида икки киши ҳалок бўлди, деб хабар беради Тергов департаменти.

Маълумотларга кўра, 15 октябрь куни соат 16:00 ларда 26 ёшли Ш.И. ўз бошқарувидаги Nexia автомобили туманнинг Чувуллоқ қишлоғи ҳудудидан ўтган Даштобод—Зомин—Бахмал 4Р-40 автомобиль йўлида йўл-транспорт ҳодисасига учраган.

Ҳайдовчи Бахмал—Ғаллаорол йўналиши бўйича ҳаракатланиб келаётган вақтида ўзига нисбатан қарама-қарши йўналишда ҳаракатланаётган 28 ёшли Э.Р. бошқарувидаги Nexia русумли автомашина йўлига чиқиб кетиб, авария содир этган.

Тўқнашув оқибатида ҳар иккала автомашина ҳайдовчиси олинган тан жароҳати сабаб ҳодиса жойида вафот этган.

Шунингдек, машиналарда бўлган икки нафар йўловчи турли кўринишдаги тан жароҳатлари олиб, Ғаллаорол тумани тиббиёт бирлашмасининг жонлантириш бўлимига ётқизилган.

Мазкур ҳолат юзасидан Ғаллаорол тумани ИИБ ҳузуридаги тергов бўлинмаси томонидан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Ўзбекистонда ўтган тўққиз ой ичида содир бўлган ЙТҲлар оқибатида қарийб 1300 киши ҳалок бўлгани тўғрисида хабар берилганди.