2020 йилнинг ўтган тўққиз ойи давомида Ўзбекистон миллий валютасининг АҚШ долларига нисбатан алмашув курси 8,6 фоизга қадрсизланди. Бу ҳақда Марказий банк томонидан тақдим этилган маълумотларда келтирилган.
Регуляторнинг маълумотларига кўра, апрель ойидаги тўғриланишдан сўнг, сўм алмашув курси нисбатан барқарор динамика кўрсатмоқда. Хусусан, миллий валюта курси январь—апрель ойларида 6,6 фоизга пасайган бўлса, май—сентябрь ойлари давомида 2 фоизга пасайган.
Таъкидланишича, йил якунига қадар миллий валютанинг алмашув курси динамикаси ички ва ташқи макроиқтисодий омиллар таъсирида, ички валюта бозоридаги мавжуд талаб ва таклифнинг жорий нисбатидан келиб чиқиб шаклланиб боради.
Марказий банк ички валюта бозорида ҳолатнинг нисбатан барқарор шаклланиши, алмашув курсининг кескин тебранишларига олиб келувчи фундаментал омиллар хатарлари эҳтимоли пастлиги кузатилмоқда. Бунда йил сўнгига қадар ички валюта бозорида хорижий валютага бўлган талаб ва таклиф мутаносиблигини сақлаш юзасидан етарли шароитлар мавжуд.
Қайд этилишича, ҳисобот даврида ички валюта бозоридаги Марказий банкнинг интервенсиялари олтин-валюта захираларининг нейтраллиги тамойилига асосланган ҳолда, маҳаллий ишлаб чиқарувчилардан сотиб олинган олтин миқдори доирасида амалга оширилган.
Марказий банк келгуси октябрь—декабрь ойлари давомида ҳам ушбу тамойилга асосан ички валюта бозорига интервенсияларни амалга ошириб боради. Бунда ички валюта бозорида хорижий валютага бўлган талабнинг сезиларли даражада ошиши кузатилган ҳолатларда заруриятга қараб, йил бошидан олтин хариди ва амалга оширилган интервенсия операциялари ўртасидаги тафовутдан ҳосил бўлган 300 миллион доллар миқдоридаги валюта захираси ҳам ушбу мақсадларга йўналтирилиши мумкин.
Мазкур даврда жисмоний шахслар томонидан валюта айирбошлаш шохобчалари орқали сотилган чет эл валютаси миқдори 3,2 миллиард долларни ташкил этиб, айни пайтда улар томонидан 2,9 миллиард доллар сотиб олинди.
Мавзуга доир: Ўзбекистонга тўққиз ой давомида юборилган халқаро пул ўтказмалари ҳажми 4,3 млрд долларни ташкил этди
Изоҳ (0)