Давлат солиқ қўмитаси 4,5 триллион сўмдан ортиқ маблағни солиқ тўловчиларга қайтариб берди, дея хабар қилмоқда қўмита матбуот хизмати.
Қайд этилишича, 2020 йил 1 январдан 9 октябргача давлат солиқ хизмати органларига қиймати 7,7 триллион сўмлик 6295 та мурожаат келиб тушган. Шундан 2773 та ҳужжат кўриб чиқилгандан сўнг уларнинг талаби қондирилган ва Молия вазирлигига юборилган. Бунинг натижасида йил бошидан бери 4,5 триллион сўм солиқ тўловчиларга қайтарилган.
Давлат солиқ қўмитасининг таъкидлашича, қўшилган қиймат солиғининг ортиқча миқдорини қоплаш (қайтариш)нинг соддалаштирилган тизими солиқ тўловчилар манфаатларига йўналтирилган.
Агар йил бошидан ҚҚС суммасини қоплаш (қайтариш) фақат алоҳида тоифага кирувчи солиқ тўловчиларга қўлланилган бўлса, энди Вазирлар Маҳкамасининг «Қўшилган қиймат солиғи ҳамда чет эл юридик шахслари билан боғлиқ солиқ маъмурчилигини такомиллаштириш чора-тадбирлари тўғрисида»ги қарорига мувофиқ шартлар ва тартиб соддалаштирилди ҳамда ҚҚС тўловчиси бўлган барча хўжалик юритувчи субъектларга нисбатан қўлланилмоқда.
У қуйидагича амалга оширилади:
1-қадам. Аризалар рўйхатдан ўтган жойидаги давлат солиқ органларига тақдим этилади.
Йирик солиқ тўловчилар йирик солиқ тўловчилар бўйича ҳудудлараро давлат солиқ инспекциясига ариза юборади.
2-қадам. Кўриб чиқиш жараёни.
Бунда ариза йирик солиқ тўловчилар, дипломатик ваколатхоналар, банк кафолати бўлган шахслар, маҳсулот тақсимоти тўғрисидаги битимлар иштирокчилари ва солиқ мониторинги иштирокчилари учун тезлаштирилган тарзда 7 кундан кечиктирмай, қўшилган қиймат солиғининг бошқа тўловчилари учун эса умумий тартибда 60 кундан кечиктирмай кўриб чиқилади.
3-қадам. Қаноатлантирилган ҳужжатлар Молия вазирлигига юборилади.
4-қадам. Давлат бюджетидан маблағлар солиқ тўловчининг банк ҳисоб рақамига ўтказилади.
Аввалроқ ҚҚС тўловчиларга тезкор сервис хизматлари кўрсатиш мақсадида «Маслаҳат маркази» ташкил этилгани ҳақида хабар берилганди.
Изоҳ (0)