Адлия вазирлиги қошидаги Давлат хизматлари агентлиги мутахассислари Ўзбекистонда фуқаролардан қайси маълумотномалар кўп сўралаётгани ва уларни қайси давлат идоралари талаб қилаётганини аниқлаш учун ўтган 1 ой давомида фуқароларнинг ДХМларга маълумотнома сўраб қилган мурожаатлари ўрганилди. Бу ҳақда вазирлик матбуот хизмати хабар берди.
Аниқланишича:
- руҳий касалликлар бўйича диспансер ҳисобида туриш ёки турмаслик тўғрисида — 39 950 та;
- наркология бўйича диспансер ҳисобида туриш ёки турмаслик тўғрисида — 35 066 та;
- фуқаролик ҳолати далолатнома ёзувлари ҳақида — 30 609 та;
- судланганлик (ёки судланмаганлик) ҳақида — 20 714 та;
- фуқаронинг номида шахсий уй-жойи борлиги ёки йўқлиги тўғрисида — 5 421 та;
- манзил-маълумот ахбороти — 981 та;
- турар жойнинг майдони тўғрисида — 12 та маълумотнома берилган.
Мониторинг натижасида ушбу ҳужжатлар асосан ишга кириш учун сўралаётгани аниқланган. Хусусан, руҳий касалликлар ва наркология диспансери ҳисобида туриши/турмаслиги ҳақидаги маълумотнома аксарият ҳолларда тиббиёт бирлашмалари ва муассасалари ҳамда ички ишлар органларига ишга кириш, тижорат банкларидан кредит олиш учун талаб қилинаётган экан. Ушбу мақсадлар учун маълумотнома 45 мингдан ортиқ фуқародан талаб қилинган.
«Тўғри, қонунчиликда мазкур турдаги маълумотномаларни сўраш мумкин бўлган ҳолатлар мавжуд. Масалан, никоҳдан ўтишда, ҳайдовчилик гувоҳномасини олишда ва ҳоказо. Айрим турдаги маълумотномалар эса асосий ҳужжатга илова сифатида белгиланмаганлиги ёки норматив ҳужжат асосида бекор қилинганлиги баъзи давлат идоралари эътиборидан четда қолмоқда», — дейилади хабарда.
Давлат раҳбарининг тегишли фармони билан 2020 йилнинг 1 сентябридан бошлаб, судланганлик/судланмаганлик ҳақида маълумотнома ҳамда манзил-маълумот ахбороти фуқаронинг розилиги билан давлат органлари томонидан идоралараро электрон ҳамкорлик орқали олиниб, фуқаролардан талаб қилиш тартиби бекор қилинган. Шунга қарамай, амалиётда сентябрь ойида фуқаролардан 22 мингга яқин ушбу турдаги маълумотномалар талаб қилинган.
Шунингдек, таҳлилларга кўра, фуқаронинг номида шахсий уй-жой бор ёки йўқлиги тўғрисида маълумотномани энг кўп талаб қилган ташкилот ва идоралар, бу — маҳаллий ҳокимликлар 1 782 та, маҳалла ва оилани қўллаб-қувватлаш органлари 1 069 та, мудофаа органлари 899 та, ички ишлар органлари 292 та, кадастр органлари 242 та, тижорат банклари 229 та ва бандлик органлари томонидан 119 та ҳолатда.
Ваҳоланки, кадастр органлари маълумотномани сўраган ташкилотга тизим орқали юбориши ҳам мумкин, дея таъкидланади хабарда.
Изоҳ (0)