Ўзбекистон Президенти ҳузурида 15 октябрь куни ўтказилган йиғилишда коррупцияга қарши курашиш масалалари ҳам кўриб чиқилди. Бу ҳақда ЎзА хабар берди.
Мажлисда охирги олти ойда бу йўналишда олиб борилаётган кескин кураш ўз натижасини бераётгани қайд этилди. Кўрилган чоралар натижасида бир қатор мансабдор шахслар қўлга олинган бўлиб, уларга нисбатан тергов ҳаракатлари олиб борилмоқда ҳамда тегишли жазо чоралари белгиланиши кутилмоқда.
Жумладан, Қибрай тумани ҳокимининг инвестиция масалалари бўйича ўринбосари Ж.Машрабов 2020 йилнинг 11 июнь куни Қибрай туманидан 9 гектар бўш ер майдонини 60 минг долларга сотишни таклиф қилиб, 35 минг долларга сотаётган вақтда жиноят устида қўлга олинган.
Тошкент шаҳар ҳокимлиги қошидаги капитал қурилиш бош бошқармаси бошлиғи ўринбосари Б.Алламуратов Чилонзор туманидаги инвестициялар ва ташқи савдо бўлими бошлиғи Х.Шукуралиевга 2020 йилнинг 25 июнь куни Чилонзор туманидаги 1 гектар ер майдонини 1,4 миллион долларга сотаётган вақтда қўлга олинган.
Андижон вилояти, Марҳамат тумани ҳокими ёрдамчиси У.Алижонов 2020 йилнинг сентябрь ойида яқин алоқалари орқали Марҳамат тумани ҳудудидан 11 гектар ер майдони ажратиш учун жами 29 минг доллар миқдоридаги ноқонуний пулни олаётган вақтда жиноят устида ушланган.
Фарғона вилояти, Бувайда тумани ҳокимининг биринчи ўринбосари М.Деҳқонов 2020 йилнинг октябрь ойида Бувайда туманида жойлашган «Эркин иқтисодий ҳудуд»дан тадбиркорлик фаолияти билан шуғулланиш учун 50 сотих ер майдонини расмийлаштириб бериш эвазига 20 минг доллар олган вақтида жиноят устида қўлга олинган.
Тошкент вилояти Оққўрғон тумани ҳокими ўринбосари А.Тўймачов, Кадастр бўлими бошлиғи И.Қорабоев билан биргаликда 2020 йилнинг 18 март куни Оққўрғон туманида жойлашган 1,5 гектар ер майдонини 1500 долларга сотаётган вақтида жиноят устида қўлга олинган.
Тошкент вилояти Бўстонлиқ тумани ҳокимининг ўринбосари З.Мирзахўжаев 2020 йилнинг октябрь ойида Бўстонлиқ туманида жойлашган 5 сотих ер майдонини 25 минг долларга сотаётган вақтида жиноят устида қўлга олинган.
Мавзуга доир:
Изоҳ (0)