Андижонда ИИБ ходимлари томонидан қийноққа солиниши натижасида вафот этган фуқаро иши бўйича тергов ҳаракатлари якунланди

Андижонда фуқаро А.Абдукаримов 2020 йилнинг май ойида ўғриликда гумон қилиниб, шаҳар ИИО ФМБ 4-сонли ички ишлар бўлимининг бир неча нафар ходимлари томонидан қийноққа солиниши оқибатида вафот этгани хабар қилинган эди.

Мазкур ҳолат юзасидан жиноят иши қўзғатилгани, тергов ҳаракатлари бош прокурорнинг шахсий назорати остида марказий маҳкаманинг Ўта оғир жиноятларни тергов қилиш бошқармаси иш юритувига олинган эди.

«Xabar.uz»нинг Бош прокуратура матбуот хизмати раҳбари Ҳаёт Шамсутдиновга таяниб маълум қилишича, мазкур жиноят иши бўйича тергов ҳаракатлари якунига етган. Унга кўра, жиноят иши айблов хулосаси билан жиноят ишлари бўйича Андижон вилояти судига мазмунан кўриб чиқиш учун юборилган.

Тергов давомида 6 нафар шахсга нисбатан Жиноят кодексининг 104 (қасддан баданга оғир шикаст етказиш), 206 (ҳокимият ёки мансаб ваколати доирасидан четга чиқиш), 227 (ҳужжатлар, штамплар, муҳрлар, бланкаларни нобуд қилиш, уларга шикаст етказиш ёки уларни яшириш), 234 (қонунга хилоф равишда ушлаб туриш ёки ҳибсга олиш) ва 235-моддалари (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан айб эълон қилиниб, 5 нафарига қамоққа олиш ва 1 нафарига муносиб хулқ-атворда бўлиш тўғрисида тилхат эҳтиёт чоралари қўлланилган.

Эслатиб ўтамиз, Андижон шаҳар Ички ишлар органлари фаолиятини мувофиқлаштириш бошқармасининг 4-сонли Ички ишлар бўлимида 30 майга ўтар кечаси қийноққа солинган фуқаро А.Абдукаримов олган тан жароҳатлари оқибатида 11 июнь куни вафот этган эди. Ушбу воқеадан сўнг 4-сонли ИИБ жиноят-қидирув гуруҳининг уч нафар тезкор вакили — катта лейтенант Ф.Ҳусанбоев, катта лейтенант Э.Райимжонов ва катта лейтенант Қ.Қодиров ички ишлар органларидан бўшатилган, 1 июнь куни уларга нисбатан Жиноят кодексининг 206-моддаси (ҳокимият ёки мансаб ваколати доирасидан четга чиқиш), 234-моддаси (қонунга хилоф равишда ушлаб туриш ёки ҳибсга олиш) ҳамда 235-моддаси (қийноққа солиш ва бошқа шафқатсиз, ғайриинсоний ёки қадр-қимматни камситувчи муомала ҳамда жазо турларини қўллаш) билан айб эълон қилиниб, суд қарори билан қамоққа олиш эҳтиёт чораси қўлланилган эди.

Июль ойи бошида Олий суд матбуот хизмати раҳбари Азиз Обидов ушбу жиноят иши суд томонидан жиноят процессуал қонунчилиги талаблари асосида ҳамда очиқлик ва шаффофлик тамойилларига мувофиқ кўриб чиқилиши, суд мажлисларида матбуот ва оммавий ахборот воситалари вакиллари ва жамоатчилик вакиллари иштирок этиши мумкинлигини айтиб ўтган эди.

Президент Шавкат Мирзиёев Чироқчи ва Андижонда ИИБ ходимларининг фуқароларни калтаклаши билан боғлиқ воқеалар учун соҳа раҳбарларини танқид қилганди. Инсон ҳуқуқлари бўйича Миллий марказ Андижонда фуқаронинг ИИБ томонидан қийноққа солинганини қатъий қоралаганди. Олий Мажлис Қонунчилик палатаси спикери ўринбосари, «Адолат» СДП сиёсий кенгаши раиси Наримон Умаров бир фуқарони қийноққа солиб, унинг ўлимига сабаб бўлган Андижон шаҳар ИИБ ходимлари ҳаракатига муносабат билдириб, Андижон шаҳар ИИБ ходимларининг ноўрин муносабати асносида касб шаъни оёқости қилингани, бир инсон энг олий ҳуқуқи бўлган яшаш неъматидан мосуво бўлгани, шу билан бирга, мамлакат раҳбарияти ва аҳоли томонидан давлатнинг халқаро имижини яхшилаш учун қилинаётган кўп сонли ҳаракатларга путур етганини таъкидлаганди.Ҳолат юзасидан ички ишлар вазири матбуот котиби Шоҳрух Ғиёсов Андижонда қийноққа солинган фуқаро вафоти сабаб узр сўраганди.