Олий суд UzAutoMotors ва Монополияга қарши кураш қўмитасининг навбатдаги ёпиқ суди ҳақида маълумот берди

16 октябрь куни Тошкент шаҳар маъмурий судида UzAutoMotors АЖнинг Ўзбекистон Республикаси Монополияга қарши курашиш қўмитаси махсус комиссиясининг 21/31-сонли ишига оид 2020 йил 19 августдаги қарорини ҳақиқий эмас деб топиш тўғрисидаги шикоят аризасини кўриб чиқиш бўйича ўтказилаётган суд жараёни давом эттирилди, дея хабар қилди Олий суд ахборот хизмати.

Олий суд ахборотига кўра ушбу маъмурий иш судья Ғ.Давлатов раислигида кўрилмоқда.

«Суд ўз ишини очиқ суд мажлисида давом эттириб, дастлаб аризачи UzAutoMotors АЖ вакили томонидан фикр билдирилди, яъни жамиятда ўтказилган текширишга асос бўлган маълумотномани шакллантиришда нархлар нотўғри киритилганлиги, яъни мисол учун Ravon русумли автомашинанинг бошқа давлатлардаги савдо мажмуаларида 2015–2016 йиллардаги нархлари интернет тармоғидан асос сифатида олинганлигини ҳамда Монополияга қарши курашиш қўмитаси ҳузурида 3 та махсус комиссия фаолият кўрсатса-да, ушбу масала фаолият доирасига кирмайдиган махсус комиссия томонидан кўриб чиқилганлиги билдирилди.

Қўмита вакиллари ҳам эътирозларини билдириб, автомашиналарнинг нархи ҳақиқатан ҳам интернет тармоқлари орқали олинганлиги, шунингдек, ҳозирги кундаги нархлар ҳам ўрганилганлиги, бугунги кунда ҳам мазкур нархларни солиштириб кўрилиши мумкинлиги маълум қилинди.

Шунингдек, улар қўмитада ҳақиқатан ҳам 3 та махсус комиссия мавжудлигини билдирган. Амалдаги низом талабига биноан ўз фаолиятини бошлаган комиссия бошқа комиссия фаолиятига боғлиқ масала кўрилганида ҳам ушбу ишни кўриб чиқиши мумкинлиги белгиланганлигини маълум қилган.

Шу билан бирга, тарафлар томонидан ариза юзасидан ўз фикр-мулоҳазаларини билдирганидан сўнг, суд UzAutoMotors акциядорлик жамияти томонидан келтирилган, яъни жамият томонидан ишлаб чиқариладиган маҳсулотларнинг таннархи шакллантирилиши методикасини ёпиқ суд мажлисида ўтказиш тўғрисидаги илтимоснома муҳокамасига ўтган.

Мазкур илтимоснома тарафлар ўртасида муҳокама қилинганидан сўнг, суд маслаҳатхонадан чиқиб, суд ажримини ўқиб эшиттирди.

Ажримга кўра, суд мажлисининг Монополияга қарши курашиш қўмитаси томонидан ўтказилган текширишда жамиятда ишлаб чиқариладиган маҳсулотларни таннархи юқори баҳоланганлиги тўғрисида кўрсатилган ҳолатлар муҳокамасини ёпиқ суд мажлисида ўтказиш белгиланди. Ёпиқ суд мажлисида суд муҳокамаси ўрнатилган тартибда давом этди ва тарафларнинг барча важлари тингланди.

Навбатдаги суд мажлиси 2020 йил 23 октябрь куни соат 10:00 да ўтказилади», – дейилади Олий суд хабарида.

2020 йил 9 октябрда ўтказилган суд мажлисида UzAuto Motors навбатдаги суд ишида товарлар нархини шакллантиришда махфий ҳужжатларга асосланганини билдирган.

Эслатиб ўтамиз, депутат Расул Кушербаевнинг танқидлари ортидан Монополияга қарши курашиш қўмитаси UzAuto Motors АЖга нисбатан иш қўзғатган эди. Қўмита компания томонидан «Рақобат тўғрисида»ги қонунни бузиш аломатларини аниқлаган.

Қўмитанинг 2020 йил 19 август куни ўтказилган йиғилишида махсус комиссия томонидан ўтказилган текширувлар компания автомобиль нархларини асоссиз оширганини тасдиқлаган. Унга кўра, автомобиллар нархи 3 миллион сўмдан 19 миллион сўмгача асоссиз оширилгани аниқланган.

Мазкур ўрганиш натижалари омма учун эълон қилингач UzAuto Motors Монополияга қарши курашиш қўмитаси қошидаги махсус комиссия қабул қилган қарор устидан судга шикоят қилишини билдирганди ва кейинроқ компания Тошкент шаҳар маъмурий судига шикоят қилгани маълум бўлганди.