Президент Шавкат Мирзиёев Тошкентдаги Дастурий маҳсулотлар ва ахборот технологиялари технологик паркида бўлди. Бу ҳақда Президент матбуот хизмати хабар қилган.
Хабарга кўра, мажмуа шоу-румида қурилиши бошланган бинолар, уларда бўладиган шароитлар ҳақида маълумот берилган. Муҳаммад ал-Хоразмий номидаги ихтисослаштирилган мактабнинг ўқувчилари иштирокида яратилган дастурий маҳсулотлар намойиш этилган.
Шунингдек, Шавкат Мирзиёев Қорақалпоғистоннинг Бўзатов туманидаги ИТ-марказда сабоқ олаётган болалар билан видеоконференсалоқа орқали мулоқот қилган.
Президент мутасаддиларга Муҳаммад ал-Хоразмий номидаги мактаб билан ҳудудлардаги ахборот технология мактаблари интеграциясини таъминлаш, ёшларнинг замонавий технологияларга қизиқишини тўғри йўналтириб, етук мутахассислар этиб тайёрлаш бўйича кўрсатмалар берган.
«Мазкур замонавий мажмуа қурилиши 2019 йил 20 ноябрда бошланган эди. Бу ерда босқичма-босқич 17 та иморат, жумладан, 20-25 қаватли офис бинолари, 22 қаватли меҳмонхона, университет, конференция зали, коворкинг маркази ва бошқа объектлар барпо этилади. Иншоотлар 9 баллдан юқори зилзилага чидамли бўлади. Ер остида 3 қаватли автотураргоҳ қурилади. Мажмуа ҳудудида кафе ва ресторанлар, дўконлар, масжид, спорт майдонлари, дам олиш жойлари ҳам бўлади.
Ушбу ИТ-паркнинг дастлабки 2 та биноси фойдаланишга топширилган. Уларда энг замонавий қулайликлар яратилиб, истиқболли стартап лойиҳаларни қўллаб-қувватлаш бўйича инкубация ва акселерация дастурлари ташкил этилган. ИТ-парк резидентлари сифатида рўйхатдан ўтган корхоналар 2028 йил 1 январга қадар солиқлар ва божхона тўловларидан озод этилган», – дейилади Президент матбуот хизматининг ахборотида.
Аввал Шавкат Мирзиёевнинг Тошкент шаҳридаги бунёдкорлик ишлари билан танишаётгани, Президент янги қурилаётган Геология университетининг биноларини кўздан кечиргани ҳақида хабар берилганди.
Изоҳ (0)