Ўзбекистон соғлиқни сақлаш тизимида қатор тайинловлар амалга оширилди

Ўзбекистон соғлиқни сақлаш тизимида бир қатор янги янги тайинловлар амалга оширилгани маълум қилинди.

Хусусан, соғлиқни сақлаш вазирининг тегишли буйруғига кўра, вазирлик ҳузуридаги академик V В.Воҳидов номидаги республика ихтисослаштирилган хирургия илмий-амалий тиббиёт марказининг директори лавозимига Исмаилов Сайдимурад Ибрагимович тайинланди.

Маълум қилинишича у 1962 йилда Тошкент шаҳрида туғилган, Ўрта Осиё тиббиёт педиатрия (ҳозирги Тошкент педиатрия тиббиёт) институтини ҳамда Ўзбекистон Президенти ҳузуридаги Давлат бошқаруви академиясини тамомлаган.

Тиббиёт фанлари доктори, профессор Сайдимурад Исмаилов кўп йиллар давомида тиббиёт соҳасида турли лавозимларда фаолият юритган. Жумладан, 17-сонли шаҳар клиник шифохонаси бош шифокори ўринбосари, Тошкент шаҳар Яккасарой тумани тиббиёт бирлашмаси бошлиғи, Соғлиқни сақлаш вазирлиги Оналик ва болаликни муҳофаза қилиш бош бошқармаси бошлиғи, Ўзбекистон Президентининг Фан, таълим, соғлиқни сақлаш ва спортни ривожлантириш масалалари хизматининг соғлиқни сақлаш ва спортни ривожлантириш масалалари гуруҳи бош консултанти лавозимларида ишлаган.

Тайинловдан аввал эса Ўзбекистон Республикаси Президенти администрацияси Ёшлар, фан, таълим, соғлиқни сақлаш ва спорт масалалари бўлинмаси шўъба мудири лавозимини эгаллаб келган.

Бундан ташқари, Республика ихтисослаштирилган хирургия илмий-амалий тиббиёт маркази директор лавозимида ишлаб келаётган академик Назиров Феруз Гафурович марказ директорининг маслаҳатчиси лавозимига ўтказилди.

Шунингдек, Ўзбекистон соғлиқни сақлаш вазирининг тегишли буйруғига кўра, вазирлик ҳузуридаги Республика ихтисослаштирилган кардиология илмий-амалий тиббиёт марказининг директори лавозимига Фозилов Хуршид Ғайратович тайинланди.

Маълумот учун у 1976 йилда Қашқадарё вилоятида туғилган бўлиб, Самарқанд давлат тиббиёт институтини тамомлаган. Шунингдек, Россиянинг А.Н.Бакулев номидаги юрак-қон томир жарроҳлик маркази клиник ординатура ҳамда аспирантурасида ўқиган.

Ўзбекистонга қайтгач, ихтисослиги бўйича фаолият юритган. Тайинловдан аввал эса 2017 йилдан буён Республика ихтисослаштирилган кардиология илмий-амалий тиббиёт маркази Қарши филиали директори лавозимини эгаллаб келган. Ўзбекистон Республикаси Олий Мажлиси Сенати аъзоси.

Бундан ташқари, ушбу тиббиёт муассасасида директор лавозимида ишлаб келаётган Ўзбекистон Қаҳрамони, академик Қурбонов Равшанбек Давлетович марказ директорининг маслаҳатчиси лавозимига ўтказилди. У Ўзбекистон Республикасида хизмат кўрсатган соғлиқни сақлаш ходими, фан соҳасидаги 1-даражали Давлат мукофоти, «Фидокорона хизматлари учун» ордени соҳиби ҳисобланади.

Шу билан бирга, Ўзбекистон соғлиқни сақлаш вазирининг тегишли буйруғига асосан Жиззах вилояти соғлиқни сақлаш бошқармаси бошлиғи лавозимига Маҳмудова Озода Жавлоновна тайинланди.

У 1975 йилда Фарғона вилоятида туғилган бўлиб, Андижон давлат тиббиёт институтини тамомлаган. Тиббиёт соҳасида акушер-гинекология йўналишида фаолият юритган. Тайинловдан аввал 2014 йилдан буён Мирзачўл туман тиббиёт бирлашмаси бошлиғи вазифасида ишлаб келган.

Аввалроқ Ички ишлар тизимида ҳам янги лавозим тайинловлари амалга оширилгани хабар қилинганди.