Зангиота туманидаги COVID-19 га чалинган беморларни даволашга ихтисослашган юқумли касалликлар шифохонасида электр таъминоти узилиб қолгани ва кислородга уланган беморлар вафот этгани ҳақида хабарлар тарқалган эди. Кейинчалик бу хабарлар расман рад этилди. 14 октябрь куни эса касалхонадаги ҳақиқий вазиятни кўрсатиш мақсадида ОАВ вакиллари учун пресс-тур ташкил этилди. Унда, жумладан, муассаса электр энергияси билан қандай таъминланиши кўрсатиб ўтилди.
Қурилиш вазирлиги масъули Алишер Ҳусановнинг сўзларига кўра, Зангиотадаги юқумли касалликлар шифохонасида электр таъминотида узилишлар бўлиши мумкин эмас, чунки «у энг сўнгги технологиялар билан таъминланган».
«Касалхонанинг электр энергия таъминоти уч томонлама, яъни Зангиота электр таъминоти корхонаси тасарруфидаги нимстанциясидан чиқувчи ‘Шифохона-1, 2’, ‘Истиқбол’ ва ‘TMZ’ нимстанцияларидан чиқувчи линиялар орқали таъминланади. Бундан ташқари, мазкур касалхонанинг реанимация бўлимлари учун махсус УПС ва дизель электр манбаи ўрнатилган бўлиб, шифохонанинг электр таъминоти учун 24 соат навбатчилик ташкил этилган», — деди Ҳусанов.
Шифохонадаги ҳар бир бўлимга подстанциялар яқин қилиб жойлаштирилган бўлиб, электр узилиши ҳолатлари бўлса, қурилмаларни тезда алмаштириш имконияти мавжуд. Бунда барча жараён автоматик тарзда амалга оширилиб, электр узилишига йўл қўйилмайди. Тиббий қурилма ва техникалар ишлатилишида электр кучланиши ошиб кетса, автоматик УПС (аккумулятор) қурилмаси ишга тушади ва дизель-мотор электр манбаига улангунга қадар электр етказиб беради.
Қайд этишларича, бундай УПС қурилмалари бутун касалхона бўйлаб ҳар битта бўлимга иккитадан ўрнатилган.
Зангиота ЮКШнинг биринчи касалхонаси директори Анвар Рустамовнинг сўзларига кўра, 2,6 минг ўринга мўлжалланган шифохона ҳозирда тўлиқ қувват билан ишлаётган бўлиб, унда 1 850 нафар бемор даволанмоқда, улардан 64 нафари реанимацияда.
«Бу ерга Тошкент шаҳри, вилоятидан ва республика бўйича беморлар келади. Касалхонамиз бугунги кун талабига жавоб берадиган энг замонавий муассаса ҳисобланади. Қурилганига 4 ой бўлишига қарамай, 14 мингдан ортиқ бемор мурожаат қилган ва уларнинг 12 мингдан ортиғи даволанган. 9—10 октябрь кунлари ижтимоий тармоқларда касалхонамизда электр ўчиб қолиши натижасида кўплаб беморлар вафот этганлиги тўғрисида асоссиз хабарлар тарқалди. Мен мана шу касалхонанинг директори сифатида, 24 соат шу ерда бўлган шахс сифатида айтишим мумкинки, нафақат электр, балки сув ва газдан ҳам узилиш бўлгани йўқ», – деди Зангиота биринчи махсус шифохонаси директори Анвар Рустамов.
Шунингдек, реанимация бўлими ходими Сурайё Қорақулова «Дарё» мухбирига берган интервьюсида бундай вазият бўлмаганини, агарда бўлса бу катта йўқотишларга олиб келишини айтиб ўтди.
Изоҳ (0)