Ўзбекистон бош вазири Абдулла Арипов Садир Жапаров номига Қирғизистон бош вазири этиб тайинлангани муносабати билан табрик йўллади. Бу ҳақда ҳукумат матбуот хизмати хабар берди.
«Табрик мактубида Қирғиз Республикаси бош вазири Садир Жапаровга ўзаро манфаатли ҳамкорликни барча йўналишларда кенгайтиришига, шунингдек, мамлакатларимиз ва халқларимиз манфаати учун стратегик шерикликни янада мустаҳкамлашига умид билдирилган», — дейилади хабарда.
Эслатиб ўтамиз, Қирғизистон парламенти (Жўқорғи Кенеши) 4 октябрь куни Садир Жапаров номзодини мамлакат бош вазири лавозимига тасдиқлади.
Қирғизистон парламенти депутатлари «Mekenchil» («Ватанпарвар») партияси асосчиси бўлган Садир Жапаровни бош вазир лавозимига 10 октябрь куни ҳам тасдиқлаган эди. Аввалги бош вазир Кубатбек Бўронов мамлакатда парламент сайловидан кейин бошланган намойишлар ва тартибсизликлар ортидан истеъфога чиққанди.
Садир Жапаров 5 сентябрь куни намойишчилар томонидан Бишкекдаги қамоқхоналардан биридан озод қилинган. У Қоракўлда 2013 йилда митинглар уюштиргани ҳамда Иссиқкўл вилояти губернатори Эмилбек Каптагаевни гаровга олгани учун 2018 йилда 11,5 йиллик қамоқ жазосига ҳукм қилинган эди.
13 октябрь куни президент Сўронбай Жээнбеков парламент қарори юридик кучга эга бўлиши учун депутатларнинг етарли сони унга овоз бериши кераклигини айтди. Мамлакат парламенти Жўқорғи Кенешда 120 та депутатлик ўрни борлиги ҳисобга олинганда, қарор қабул қилиш учун камида 61 нафар депутатнинг овози керак эди.
Сўронбай Жээнбеков республика парламентининг янги спикери Канат Исаевга мурожаат қилиб, Садир Жапаров раҳбарлигидаги ҳукумат таркибини яна тасдиқлашни таклиф қилганди.
Депутат Миктибек Абдилдаев янги сайланган бош вазир Садир Жапаровга қарши қўзғатилган жиноий иш тўғрисида эслатиб, у ҳали оқланмаганини таъкидлаб ўтди. Садир Жапаров бунга жавобан Олий суд унинг ишини қайта кўриб чиқиш учун қайтарганини, шу сабабли у маҳкум ҳисобланмаслигини билдирган.
Изоҳ (0)