Россиялик яккакурашчи Ислом Махачев UFC 254 мусобақасида қатнашмайди, дея хабар бермоқда Кевин Айол.
Эслатиб ўтамиз, Рафаэл дос Аньос коронавирусга чалинганидан кейин сўнг Махачев рақибсиз қолганди. Манбага кўра, Махачев қисқа вақт ичида потенциал рақиб билан жанг қилишдан бош тортган.
Махачев ва дос Аньос ўртасидаги жанг 24 октябрь куни Абу-Дабидаги (БАА) «Жангчилар ороли»да бўлиб ўтиши керак эди. Худди шу мусобақада Ҳабиб Нурмагомедов ва америкалик Жастин Гэтжи ўртасидаги чемпионлик жанги ҳам ўтказилади.
Ислом Махачев айни дамда UFC енгил дивизиони рейтингида 12-ўринни эгаллаб турибди. У сўнгги жангини 2019 йилнинг сентябрида ўтказган ва унда Деви Рамосни мағлуб этганди. Махачев апрель ойида жанг ўтказиши белгиланганди, бироқ у коронавирус сабаб бекор қилинди.
Ислом MMA’да жами 19 та жанг ўтказиб, уларнинг 18 тасида ғалаба қозонган ва бир марта мағлубиятга учраган. Спортчи UFC’даги 8 жангининг еттитасини ғалаба билан тугатган.
Изоҳ (0)