Бойсунда Lacetti ва Cobalt тўқнашиши оқибатида икки киши воқеа жойида вафот этди

Сурхондарё вилояти Бойсун туманида Lacetti ва Cobalt иштирокида содир бўлган ЙТҲда икки киши ҳалок бўлди, деб хабар бермоқда ЙҲХББ.

Қайд этилишича, Сурхондарё вилояти Бойсун тумани «Тўда» МФЙ ҳудудидан ўтувчи 4R-105 автомобиль йўлининг 19-километрида 2020 йилнинг 13 октябрь куни соат 04:30 ларда йўл-транспорт ҳодисаси содир бўлган.

Ҳайдовчи, 1987 йилда туғилган С.О. Lacetti русумли автомобиль тезлигини меъёридан оширган ҳолда бошқараётиб, ўзидан олдинда бўлган транспорт воситасини қувиб ўтиш мақсадида қарама-қарши йўналишга чиқиб ҳаракатланган вақтида қаршисидан келаётган ҳайдовчи, 1994 йилда туғилган Ж.Х. бошқарувидаги Cobalt русумли автомобиль билан тўқнашган.

Натижада, Lacetti русумли автомобиль ҳайдовчиси, 33 ёшли С.О. ва Cobalt русумли автомобиль йўловчиси, 30 ёшли А.И. оғир тан жароҳатлари олиб воқеа жойида вафот этган. Шунингдек, Cobalt русумли автомобиль йўловчиси, 31 ёшли Н.Н. тан жароҳати олиб шифохонага ётқизилган.

Мазкур ЙТҲ юзасидан Бойсун тумани ИИБ ҳузуридаги Тергов бўлими томонидан Жиноят кодексининг 266-моддаси 3-қисми «а» банди (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, ҳозирда тергов ҳаракатлари олиб борилмоқда.

Аввалроқ Жиззахда ёритиш чироқларисиз ҳаракатланган Cobalt юк машинасига урилиши оқибатида бир киши, Фарғонада автомобиль бошқарувини йўқотиб, дарахтга урилган 16 ёшли ҳайдовчи, Андижонда Damas юк машинасига урилиши оқибатида вояга етмаган йўловчи ва Чилонзорда автомобиль бошқарувини йўқотиб, дарахтга урилган 21 ёшли ҳайдовчи ҳалок бўлгани ҳақида хабар берилганди.