«Тоҳир ва Зуҳра» мусиқий фильми 1999 йилда суратга олинган. Унда бош ролларни Тоҳир Содиқов (Тоҳир) ва Паризода Бўрихўжаева (Зуҳра) ижро этган. Фильмда, шунингдек, кўплаб таниқли актёрлар, хонандаларни ҳам турли образларда кўриш мумкин.
Картинада Зуҳра образини яратган актриса Паризода Бўрихўжаева кино соҳасидаги муваффақиятидан сўнг Достон Убайдуллаевнинг «Туғилган кунинг», «Ягонам» каби клипларида суратга тушган. Шундан сўнг томошабинлар актрисани бошқа бирорта клип ёки фильмда кўрмади.
«‘Тоҳир ва Зуҳра’ фильмида роль ижро этганимда 14-15 ёшда эдим. Кинога кириб келишим тасодифан юз берган. Ҳеч қачон актриса бўламан, деб ўйламасдим. У пайтгача бир нечта қўшиқ айтган эдим, шоу-бизнесга қизиқардим. Умуман олганда, санъат мен учун бегона эмасди. Отам Алишер Эшонхўжаев катта давлат байрамларида режиссёр бўлганлар. Шунинг учун ёшлигим саҳнада, студияда ўтган десам, муболаға бўлмайди. Шунинг учун санъат мени ўзига ром этган.
Саҳнага чиққанимда режиссёрлар мени кўриб, шу қиз тўғри келади, деб ўйлашган. Фильмга жуда катта кастинг бўлган. Лекин мен борган куним ўша куннинг ўзидаёқ бу ролга мени танлашган», — дея ҳикоя қилади Паризода Бўрихўжаева.
«14 ёшингизда 18-20 ёшли қизнинг ролини ижро этиш қийин бўлмаганми?» деган саволга Паризода шундай жавоб беради:
«Жуда қийин бўлган. Ҳозир кўзим билан қарасам, идеал даражада ўйнамаганман, деб ўйлайман. Лекин профессионал даражадаги жамоа менга катта ёрдам берган. Режиссёр ўз фарзандидек қараб, тушунтирган.
Севги тўла кўзлар билан қаранг, дейишса, севги нималигига тушунмасдим. Ёш боламан. Шунда режиссёр менга жуда яхши кўрган нарсангга қанақа қарайсан, шундай қара, деган. Фикримча, ёш қиз, биринчи муҳаббат жуда табиий чиққан».
«Отам жуда кўп санъаткорларни юлдуз даражасига олиб чиқишга кўмаклашган инсон. Мен уларга доим, мен-чи, қачон юлдуз бўламан, дердим. Улар эса сен аввал катта бўлгин, турмушга берай, кейин янги оиланг рози бўлса, жуда тез юлдуз қиламан сени, дердилар. Кейин турмушга чиқдим, фарзандли бўлдим ва оиламга шўнғиб кетдим», — дейди Паризода санъатни тарк этгани ҳақида.
Паризоданинг айтишича, «Тоҳир ва Зуҳра»нинг давоми суратга олинаётганида унга қўнғироқ бўлган.
«Ўша пайтда қизимни энди дунёга келтиргандим. Турмуш ўртоғим менимча, ҳозир тўғри келмайди, дегандилар. Мен ҳам оилани танлаб, бошқа ишлар билан шуғулланиб кетганман», — дейди актриса.
Жаҳон иқтисодиёти ва дипломатия университетини тамомлаган Паризода суҳбат давомида санъатга яқин инсон барибир бошқа соҳада ишлай олмаслиги, санъатни қўмсашини таъкидлаб ўтган.
«Санъатга яқин инсон бошқа соҳада ишлаши қийин экан. Соҳамни қизиқиб ўқидим, банкда ишладим, лекин қизиқишим санъатга тортиб кетди», — дейди актриса.
Маълум бўлишича, ҳозирги кунда Паризода ўз соҳасида анча таниқли фотографга айланган. У янги туғилган чақалоқларни суратга туширади.
У ҳозир ҳам кинога кўплаб таклифлар бўлаётгани, бироқ ўзига ёққан ролни учратмаганини ҳам айтиб ўтган. Паризоданинг айтишича, агар кўнглига ёқадиган образ бўлса, миллионлаб мухлислари уни яна киноларда кўриши мумкин.
Изоҳ (0)