Беларусь мухолифати етакчиси Светлана Тихановская Россия Ички ишлар вазирлигининг қидирилаётган шахслар базасига киритилди. Бу ҳақда Meduza хабар берди.
«ТАСС»нинг ҳуқуқни муҳофаза қилувчи идоралардаги манбаси маълум қилишича, қидирув Беларусда эълон қилинган, бироқ у Россияда ҳам амалга оширилади, чунки гап давлатлараро қидирув ҳақида кетмоқда. Беларусда Тихановская миллий хавфсизликка қарши қаратилган ҳаракатларга чорлаш моддаси бўйича айбланмоқда.
Россия Ички ишлар вазирлигининг қидирилаётган шахслар базасига Беларусь мухолифатининг Nexta Telegram канали бош муҳаррири Роман Протасевич ҳам киритилган.
Беларусь Марказий сайлов комиссияси маълумотларига кўра, Светлана Тихановская президентлик сайловида 10,1 фоиз овоз тўплаган. Сайловларни сохталаштириш ҳақидаги маълумотлар фонида Беларусда оммавий норозилик намойишлари бошланди. Тихановскаянинг ўзи эса мағлубиятини тан олмади ва ўзини «Беларусь халқи томонидан сайланган ягона етакчи» деб атади.
Ҳозирги пайтда Тихановская Европада бўлиб турибди. У сайловдан бир неча кун ўтгач Беларусдан чиқиб кетишга мажбур бўлган. Бунга мамлакат расмийларининг ундан сайлов натижаларини тан олишни талаб қилиб ўтказган босими ва таҳдидлари сабаб бўлган.
Беларусда миллий хавфсизликка қарши қаратилган ҳаракатларга чорлаш моддаси билан Тихановскаянинг сафдошлари — мухолифат мувофиқлаштирувчи кенгаши аъзолари Максим Знак ва Мария Колесникова ҳам айбланмоқда.
Изоҳ (0)