Кимё бўйича 2020 йилги Нобель мукофоти геномни таҳрирлаш усулларини ишлаб чиққани учун Эммануэль Шарпантье ва Женнифер Дуднега топширилди, деб хабар бермоқда «РИА Новости».
Ҳозирда Германияда ишлаётган франциялик микробиолог Шарпантье ва унинг ҳамкасби, америкалик биокимёгар Женнифер Дудне (АҚШнинг Калифорния штатидаги Беркли университети) бир неча йил аввал бактерияларда уларни вируслардан ҳимоя қиладиган молекуляр »иммунитет»ни кашф қилган. Ундан турли организмлар геномларини ўта аниқ таҳрирлашда фойдаланишга эришилган. Бугунги кунда бутун дунёдаги олимлар геном таҳриридан жиддий касалликларни, шу жумладан, ОИТС ва ирсий касалликларни даволашга ёндашувларни яратишда фойдаланмоқда.
5 ва 6 октябрь куни Нобель қўмитаси тиббиёт ва физиология ҳамда физика бўйича мукофот совриндорларининг номларини эълон қилди. 8 октябрь куни адабиёт бўйича ким мукофотга лойиқ кўрилгани, 9 октябрь куни эса тинчлик мукофоти номзоди, 12 октябрь куни эса иқтисодиёт бўйича совриндорлар эълон қилинади.
2020 йилда Нобель мукофоти миқдори оширилган бўлиб, 10 миллион швед кронаси (тахминан 1,1 миллион доллар)ни ташкил этади. COVID-19 эпидемияси туфайли 2020 йилда мукофотни топшириш анъанавий маросими ўтказилмайди.
Нобель қўмитаси қоидаларига кўра, мукофот олишга потенциал номзодлар рўйхати сир сақланади. Аммо қатор ОАВлар йил давомида тинчлик мукофотига баъзи машҳур президент ва сиёсатчилар илгари сурилгани ҳақида хабар берган. Хусусан, Россия президенти Владимир Путин тинчлик бўйича Нобель мукофотига номзод қилиб кўрсатилган, 19 сентябрь куни эса россиялик олим, Нью-Жерсидаги Ратгерс университети профессори Сергей Ерофеев сиёсатчи Алексей Навальний Нобель мукофотига номзод қилиб кўрсатилганини маълум қилганди.
Ундан аввал норвегиялик депутат, кейинроқ Швеция парламенти аъзоси Дональд Трампга тинчлик бўйича Нобель мукофоти беришни таклиф қилган.
Изоҳ (0)