Титаник ўлчамидаги улкан айсберг Гренландиянинг Инаарсуит қишлоғига хавфли даражада яқинлашди. Бу ҳақда New York Post хабар берди.
Муз массаси бир неча кундан буён қишлоқ томон силжиб бормоқда. Маҳаллий ҳокимият аҳолини огоҳлантирган ва эҳтиёт чораси сифатида балиқ заводи ҳамда дўконни вақтинча ёпган.
Агар муз бўлаги қирғоққа урилса ёки парчаланса, кучли тўлқинларга сабаб бўлиб, биноларга зарар етказиши мумкин. Тўлқинлар паст жойлашган ёки аллақачон зарар кўрган уйларни бутунлай ювиб кетиши мумкин, деди оролнинг расмий вакиллари.
Маҳаллий расмийлар аҳолига қайиқда оролга бориш ёки ундан қайтишда айсбергга яқинлашмасликни, ҳаттоки кундалик ишлар вақтида ҳам ҳушёр бўлишни тавсия қилган.
Айсбергнинг баландлиги 100 метрдан, оғирлиги эса тахминан 12 миллион тоннадан ошади. Уни биринчи марта бир ҳафта олдин пайқашган. Аввалига оқим айсбергни бошқа томонга олиб кетган, бироқ ҳафта бошида у яна қайтиб келган.
Фавқулодда ҳолат эълон қилингач, қишлоқнинг бир қисми эвакуация қилинган. 2018 йилда ҳам Инаарсуит қишлоғига улкан айсберг яқинлашган эди. Ўшанда ҳам аҳоли хавфсизлик нуқтайи назаридан эвакуация қилинган, аммо айсберг талафот етказмай сузиб кетган эди.
Изоҳ (0)