Андижон вилоятининг Балиқчи туманида халқ депутатлари кенгашининг олтинчи чақириқ, тўққизинчи сессияси бўлиб ўтди. Унда Олий Мажлис Сенати раиси Танзила Норбоева ҳам иштирок этди, дея хабар бермоқда «Дарё» мухбири Умиджон Мамарасулов.
Сессияни туман ҳокими Жасурбек Абдураимов олиб борди. У сектор раҳбарлари билан бирга йўл қўйилган камчиликлар учун Президент ҳамда туманда яшовчи 199 мингдан ортиқ аҳолидан узр сўради.
Туман ҳокими ҳудудни 2020—2021 йилларда комплекс ижтимоий-иқтисодий ривожлантириш орқали «қизил» ҳудудлар қаторидан чиқариш бўйича «йўл харитаси»ни тақдим қилди ва шунга асосан йил охирига қадар «ўрта», 2021 йилда эса «яхши» туманлар қаторига олиб чиқишга ваъда берди.
Ҳокимнинг маълумот беришича, 2020 йил охирига қадар саноат йўналиши бўйича жами 283 миллиард 416 миллион сўмлик 11 та йирик лойиҳани ишга тушириш белгиланган. Шунингдек, аҳоли бандлиги даражасини ошириш учун ҳудудий инвестиция дастури асосида 2020 йилнинг ўзида 373,6 миллиард сўмлик 59 та лойиҳа амалга оширилиши ҳисобига 1879 та янги иш ўрини яратилиши кўзда тутилган.
Сессия якунида Танзила Норбоева туманнинг «қизил» ҳудудга кириб қолишига сабабчи бўлган омиллар ҳақида гапириб, сессия давомида сўзга чиққан туман кенгаши депутатларидан бирининг фикрига эътироз билдирди.
«Сессия давомида депутатларимиздан бири туманда кўп яхши ишлар бўляпти. Менимча рейтингда ‘қизил’ ҳудудга кириб қолишимизда биз депутатларнинг етарли тарғибот-ташвиқот ишларини амалга оширмаганимиз сабаб бўлдимикан, деди. Бу нима дегани? Қўлимизда аниқ факт турибди. Рейтинг бўйича сўралган барча кўрсаткичлар Балиқчида жуда паст. Албатта, бунда депутатларнинг айби бор. Барча сессияларда бугунгидек фаол бўлиб, тумандаги барча давлат идоралари раҳбарлари ҳисоботини эшитганида, балки бунақа бўлмасди. Гап тарғиб қилишда эмас, депутатларнинг қандай ишлашида. Ана шундагина сизлар бугун тасдиқлаётган ‘йўл харита’нгиз бўйича мақсадга эришасизлар», — деди Танзила Норбоева.
Сенат раиси тайёрланган «йўл харитаси»ни асос учун қабул қилиши мумкинлигини, лекин уч кун муддатда депутатларнинг таклиф ва ташаббуслари асосида унга ўзгартиришлар киритиш учун қайта кўриб чиқиш лозимлигини билдирди.
Эслатиб ўтамиз, 2020 йил 24 сентябрь куни Президент Шавкат Мирзиёев раислигида ҳудудларда тадбиркорликни ривожлантириш бўйича қўшимча чора-тадбирлар муҳокамасига бағишланган видеоселектор йиғилиши бўлиб ўтганди. Унда ҳудудларни ижтимоий-иқтисодий ривожлантиришни рейтинг баҳолаш тизими жорий этилгани, шунга кўра биринчи марта туман ва шаҳарлардаги иқтисодий кўрсаткичлар, тадбиркорликни қўллаб-қувватлаш муҳити, инфратузилма ва мавжуд ресурслардан фойдаланиш даражаси ўрганилганди. Таҳлиллар асосида улардаги тадбиркорлик ривожи ҳолати «яхши», «ўрта» ва «қониқарсиз» ҳудудларга ажратилган. Хусусан, 48 та туман ва шаҳардаги ҳолат «яхши», 119 тасида «ўрта» ҳамда 33 тасида «қониқарсиз» деб топилган.
Изоҳ (0)