Тадбиркор ва блогер Азиза Умарова ўзининг Telegram’даги саҳифасида «Сардоба харобаларида» номли пост қолдириб, унда Сирдарё вилояти, Мирзаобод тумани, «Ҳақиқат» маҳалласида илгари молхона, омборхона бўлган жой энди бир оила учун бошпанага айланганини ёзди.
Унинг айтишича, оила 44 ёшли идиш ювувчи бўлиб ишлайдиган аёл Г.А., унинг «санитарка» бўлиб ишлайдиган, турмуши ўхшамаган 25 ёшли қизи ва унинг 5 ёшли ўғли ҳамда 16 ёшли яна бир қизидан иборат. Бу оила сув тошқинидан жабрланганлар сифатида ҳеч қандай моддий ёрдам олмаган. Уйининг кадастри бўлмагани учун давлат уларга уй бермаган, ўрнига беш қаватли янги уйдан кредитга хонадон сотиб олишни таклиф қилишган.
Азиза Умарова Сардобада жабр кўрган одамларнинг муаммоларига эътибор қаратишни сўраб, ушбу оила ва унга ўхшаганларга уй беришни илтимос қилган.
Бунга муносабат билдирган Сирдарё вилояти ҳокимлиги матбуот хизматининг маълум қилишича, Сардобадаги тошқиндан сўнг ушбу оила Сардоба сув омборидаги техноген ҳолат сабаб юз берган сув тошқинига қадар Г.А. набираси ва икки нафар қизи билан укасининг уйида бирга яшаб келган. Уй эса укасининг рафиқаси номида бўлиб, етказилган зарарини қоплаш мақсадида ҳозирда янги қурилаётган уй-жойлардан бири берилиши назарда тутилган ва ҳужжатлари қабул қилинган. Шунингдек, унга ҳукумат томонидан 40 миллион сўмлик компенсация пули, маиший техника учун сертификат берилган.
Г.А. ва унинг фарзандлари ҳам эътибордан четда қолмаган. Боқувчиси йўқлиги, бунинг устига, икки нафар қизи ва набираси билан яшаётганлиги инобатга олиниб, унга ҳам 40 миллион сўм пул, маиший техника учун сертификат ажратилган.
Тошқиндан сўнг барча эвакуация қилинганлар қаторида Г.А. ҳам оила аъзолари билан туман марказидаги коллеж ётоқхонасига жойлаштирилиб, етарлича озиқ-овқат ва кийим-кечак билан таъминланган. Аммо у коллеж ётохонасида маълум муддат яшагач сув тошқинига қадар истиқомат қилган хонадонининг илгари молхона, омборхона ўрнида фойдаланилган қисмига келиб жойлашган.
Куз мавсумининг ёғингарчиликлари ҳисобга олиниб, туман ҳокими ўринбосари, маҳалла ва оилани қўллаб-қувватлаш бўлими бошлиғи томонидан Г.А. ва унинг оила аъзолари автобус билан туман марказидаги коллеж ётоқхонасига яна олиб келинган. Иссиқ овқат, кийим-кечак билан таъминланган бўлса ҳам, сабабсиз равишда яшаш учун яроқсиз бўлган жойга яна қайтиб кетган.
«Аён бўлишича, Г.А. бундай хатти-ҳаракатлари билан талафот кўрган аҳоли учун қурилаётган уйлардан ўзи ва оиласи учун ҳам ажратилишини хоҳламоқда. Бироқ белгиланган тартиб-қоидалар мавжуд», — дейилади вилоят ҳокимлиги хабарида. Яъни, юқорида таъкидланганидек, Г.А. талафотдан олдин яшаган хонадони укасининг турмуш ўртоғи номида бўлганлиги сабаб унинг номига ҳужжатлар расмийлаштирилган.
Қайд этилишича, шундай бўлишига қарамай, фуқаронинг оилавий шароити ҳисобга олиниб, айни кунларда Г.А.га «Ҳақиқат» маҳалласида қурилаётган уй-жойлардан ипотека кредити асосида хонадон ажратилиши учун керакли ҳужжатлар вилоят ишчи гуруҳи томонидан қабул қилинган ва ўрганилиш жараёнида.
Изоҳ (0)