Сурхондарё вилояти Жарқўрғон туманида судьяларнинг омма олдида обрўсизлантирилгани, суд ходимининг эса дўппослангани юзасидан 2020 йил 14 июль куни жиноят иши қўзғатилганди. Вилоят прокуратураси матбуот хизмати ушбу ҳолат бўйича қўзғатилган жиноят иши тугатилганини маълум қилди.
Вилоят прокуратураси томонидан Р.Р. енгил тан жароҳати олганлиги ҳолати юзасидан юзлаштириш ва бошқа бир қатор тергов ҳаракатлари ўтказиш лозимлиги сабабли 2020 йил 14 июль куни Жиноят кодексининг 206-моддаси (ҳокимият ёки мансаб ваколати доирасидан четга чиқиш) 1-қисми билан жиноят иши қўзғатилган.
Тергов давомида аниқланишича, ҳолат бўйича Р.Р. ўзининг кўрсатмасида уни ҳеч ким уриб, тан жароҳати етказмагани ва ҳеч кимга даъвоси йўқлигини билдирган.
Тергов якунига кўра, ҳолат юзасидан бирор-бир шахснинг ҳаракатида жиноят таркиби бўлмаганлиги сабабли жиноят иши 2020 йил 30 сентябрь куни Жиноят процессуал кодексининг 83-моддаси 2-қисмига асосан ҳаракатдан тугатилган.
Маълумот учун, Жиноят процессуал кодекснинг 83-моддаси 2-қисмига кўра, гумон қилинувчи, айбланувчи ёки судланувчининг қилмишида жиноят таркиби бўлмаса, у айбсиз деб топилади ва реабилитация қилинади.
Изоҳ (0)