Ўзбекистонда коронавирус инфекцияси асоратлари оқибатида вафот этганлар сони 4 октябрь ҳолатига «Дарё» ҳисоби бўйича жами 501 кишини ташкил этди.
Соғлиқни сақлаш вазирлиги (ССВ) 4 октябрь соат 23:00 ҳолатига кўра Ўзбекистонда коронавирусга чалинган яна икки киши вафот этганини маълум қилди. Шундай қилиб, ССВ ҳисоби бўйича 4 октябрь беш киши, мамлакатда расман пандемия бошланганидан бери эса 482 киши COVID-19 инфекцияси қурбонига айланган.
Айни вақтда, «Дарё» 22 сентябрга қадар юритган ҳисоб бўйича Ўзбекистонда яна камида 19 киши коронавирус оқибатида вафот этган. Улар айнан коронавирус қурбонига айлангани (улар орасида тиббиёт ходимлари, прокурорлар, судьялар, ҳокимлар бор) давлатнинг бошқа органлари ва ташкилотлари маълум қилинган, бироқ расмий статистикани юритаётган ССВ томонидан расман тан олинмаган.
Коронавирус инфекцияси асоратлари оқибатида вафот этгани давлатнинг бошқа органлари ва ташкилотлари томонидан маълум қилинган, бироқ ССВ томонидан тан олинмаган фуқаролар қуйидагилардир:
- 9 ва 15 июль кунлари Олмалиқ шаҳар шифохоналарида вафот этган икки аёл;
- ДХА Навоий вилояти бошқармаси ходими Адҳамжон Деҳқонов;
- Маданият вазирлиги ходими Акмал Ирисов;
- Чилонзор тумани СЭОМ бактериология лабораторияси мудири Марҳабо Аҳмедова;
- Бош прокурорнинг собиқ ўринбосари, Қорақалпоғистон прокуратурасида бўлим бошлиғи Ҳакимбай Халимов;
- Жиноят ишлари бўйича Тошкент вилоят суди судьяси Хайриддин Шермуҳамедов;
- Самарқанд вилояти Тойлоқ тумани прокурори Фарҳод Абдухолиқов;
- Инновацион соғлиқни сақлаш миллий палатаси «Буюк келажак» кенгаши эксперти Санжар Жалолов;
- Бердақ номидаги Қорақалпоқ давлат академик мусиқали театри артисти Жанабай Утепбергенов;
- Ўзбекистонда хизмат кўрсатган санъат арбоби, «Ўзбеккино» миллий агентлиги Бадиий кенгаши аъзоси Анвар Эргашев;
- «Ўзметкомбинат» акциядорлик жамияти бошқаруви раиси Сергей Вюненко;
- Қашқадарё вилоятининг Миришкор тумани ҳокими Ғайрат Бегалиев;
- Шифокор Фаррух Рустамов;
- Хоразм вилояти Қўшкўпир тумани Фавқулодда вазиятлар бўлими бошлиғи майор Дониёр Жабборов;
- ИИВ подполковниги Абдураҳмон Пардиев;
- Жиноят ишлари бўйича Андижон вилоят судининг судьяси Шавкатжон Шодмонов;
- «Миллий тикланиш» демократик партияси вакили, Халқ депутатлари Яшнобод туман Кенгаши депутати Дилдора Умарова;
- Хоразмлик шифокор Бахтиёр Қиличев;
- Халқ таълими вазирлиги ходими Шуҳрат Расулов.
Изоҳ (0)