Тошкент шаҳридаги жиноий шерикларига наркотик модда етказиб бериш мақсадида йўлга чиққан самарқандлик фуқаро қўлга олиниб, унга нисбатан жиноят иши қўзғатилган, дея хабар берди «Дарё» мухбири.
Маълум бўлишича, 2020 йилнинг 29 сентябрь куни ДХХ Самарқанд вилояти бошқармаси, вилоят ИИБ ҳамда Божхона бошқармаси ходимлари ҳамкорлигида «рейд» ўтказилган. «Рейд»да Булунғур тумани ҳудудидаги «Юқори нуқта» ЙПХ масканида Cobalt машинаси тўхтатилиб, холислар иштирокида кўздан кечирилган.
Текширув давомида ҳайдовчи, 1974 йилда Иштихон туманида туғилган С.А.нинг ёнидан 23 гр «опий» гиёҳвандлик моддаси, автомашинадан 200 доллар ва 4 миллион 200 минг сўм миқдоридаги пуллар борлиги аниқланиб, процессуал тартибда расмийлаштирилиб олинган.
Аниқланишича, С.А. гиёҳванд моддасини Тошкент шаҳрида яшовчи жиноий шерикларига етказиб беришни режалаштирган.
Ушбу ҳолат бўйича бошқарма Тергов бўлими томонидан Жиноят кодексининг 246-моддаси (Контрабанда) ва 273-моддаси (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилган. Тергов ҳаракатлари олиб борилмоқда.
Изоҳ (0)