Ёшлар ишлари агентлигининг Қашқадарё вилоят бошқармаси «Дарё» интернет-нашрида 28 сентябрь куни эълон қилинган «Қашқадарёдаги айрим туманларда Ёшлар ишлари бўлимларига агентлик тавсия қилган номзодлар эмас, бошқалар тайинланди. Чунки агентликнинг хати ‘юридик кучга эга эмас’» сарлавҳали мақолага муносабат билдирди.
Мақолада Ёшлар ишлари агентлигининг Деҳқонобод, Чироқчи ва Ғузор туманларидаги бўлимлари раҳбарлигига агентлик томонидан бошқа мутахассислар тавсия қилинган бўлса-да, агентликнинг вилоят бошқармаси кўрсатиб ўтилган ҳудудлардаги қуйи ташкилотларга бутунлай бошқа шахсларни бошлиқ қилиб тайинлагани ҳақида сўз боради.
Ёшлар ишлари агентлиги туман бўлимлари бошлиқлигига номзодларни тавсия қилишдан аввал август ойида Қашқадарёдаги 15 та шаҳар ва туман ҳокимлари кўрсатган уч нафардан номзод – жами 45 киши билан суҳбат ўтказган. Агентлик айнан шу суҳбатдан ўтганлар билан 19 августдан бошлаб уч ой синов муддатига шартнома тузишни тавсия қилган.Бироқ Қашқадарё вилояти бошқармаси агентлик тавсиясига зид ўлароқ, номзодлар билан қайта суҳбат ўтказиб, айрим ҳудудлардаги қуйи ташкилотларга бошқаларни бошлиқ қилиб тайинлаган. Бошқарманинг 29 сентябрдаги муносабатида таъкидланишича, бунга айрим номзодларнинг «иш ҳақидан қониқмагани, соҳада тажрибаси етарли эмаслиги» сабаб қилиб кўрсатиб ўтилган.
«Деҳқонобод тумани бўлими бошлиғи лавозимига тавсия этилган номзод Адҳам Қулмаматов билан суҳбат ўтказилганда, у тизимда мавжуд муаммоларни яхши билмаслиги, раҳбар сифатида иш ташкил этиш бўйича аниқ режаси йўқлиги маълум бўлди. Шу туфайли биз соҳада тажрибаси бор, илгари туман Ёшлар Иттифоқи раиси бўлиб ишлаган Ойбек Нурмуродовни муносиб деб билдик», -- дейди агентликнинг Қашқадарё вилоят бошқармаси бошлиғи Шоҳжаҳон Омонов.
Вилоят бошқармасининг кадрлар билан ишлаш бўйича мутахассиси сўзларига кўра, Чироқчи туман бўлими бошлиғи лавозимига тавсия этилган Алишер Бекназаров билан 12 сентябрь куни боғланилган (ваҳоланки, Ёшлар ишлари агентлиги тавсия этилган номзодлар билан 19 августдан бошлаб шартнома тузишни сўраган), аммо Бекназаров «мактабда ишлаши, иши кўплиги ва ишлаш нияти йўқлиги»ни айтган. Шу боис унинг ўрнига 16 сентябрда Жамшид Хурсандов тайинланган.
Ғузор тумани бўлими бошлиғи лавозимига тавсия қилинган Нодир Саидов эса, вилоят бошқармаси муносабатида таъкидланишича, «иш ҳақи уни қониқтирмагани» боис ишни рад этган. Ҳозирда унинг ўрнига бошқа туман ҳокимлиги тавсия қилган бошқа номзодлар кўриб чиқилмоқда. Муносабатда алоҳида таъкидланишича, Нормуродов ва Хурсандовнинг тайинлови эса Ёшлар ишлари агентлиги билан келишилган ҳолда амалга оширилган.
Ёшлар ишлари агентлиги томонидан ташкилотнинг Чироқчи туман бўлими бошлиғи лавозимига тавсия этилган, бироқ якунда бу лавозимга тасдиқланмаган Алишер Бекназаровнинг «Дарё»га маълум қилишича, вилоят бошқармасининг муносабатига ёлғон аралашган, бошқарма масъуллари уйдирма тўқимоқда.
«Биз ташкилот ишини телефонда ҳал қилиб қўядиган кўча боласи эмасмиз-ку. Агентлик тавсияси билан унинг тумандаги масъул ходими деб топилганимиздан сўнг, телефонда бир оғиз ‘йўқ, ишламайман’ десак -- бу гапни-ку айтмаганман, айтган бўлганимда ҳам -- шу етарли бўладими? Унда ‘нега номзодингизни қўйгандингиз, суҳбатда қатнашишдан мақсад нима эди?’, деган савол туғилмайдими? Буни ҳокимлик орқали ҳал этишлари керакмасмиди?», -- дейди у.
«Дарё»да эълон қилинган аввалги мақолада Ёшлар ишлари агентлигининг кадрлар масаласи бўйича масъули Шомурод Сатторов ташкилотнинг ҳудудий бошқармаларга чиқарилган тавсия хати «юридик кучга эга эмас»лигини таъкидлаб, ўзининг шахсий фикрича, «агентликнинг туман ва шаҳар бўлимларига Ёшлар иттифоқининг ҳудудий раҳбар кадрлари қўйилиши тўғри деб ўйлаши»ни айтиб ўтган эди.
Ёшлар ишлари агентлиги масъуллари ўтказган суҳбатлардан «тажрибасиз, муаммолардан бехабар, иш режаси йўқ, иш ҳақидан бехабар» мутахассислар ўтиб кетганига, вилоят ташкилоти расмий ишларни оддий телефон суҳбати орқали (шунда ҳам юқори турувчи ташкилотнинг хатидан салкам бир ой ўтиб) ҳал қилаётганига агентлик ва унинг раҳбари Алишер Саъдуллаев қандай муносабат билдиради? Ташкилотнинг оддий тайинлов ишларида шунча тартибсизлик ва тушунмовчилик, ёшларнинг катта ишлари, катта муаммолари қандай ҳал қилинади?
Изоҳ (0)