Ўзбекистон бўйича тўй ва маросим ўтказиш билан боғлиқ бир кунда 300 тагача қоидабузарлик содир этилган. Бу ҳақда Ички ишлар вазирлиги ахборот хизматига таяниб, ЎзА хабар берди.
ИИВ ахборот хизмати бошлиғи Шоҳруҳ Ғиёсовнинг маълум қилишича, ушбу йўналишда Сирдарё вилоятида 16 та, Жиззахда 21 та, Навоийда 32 та, Бухорода 48 та, Андижонда 14 та, Наманганда 74 та, Қашқадарёда 41 та, Сурхондарёда 10 та ва Қорақалпоғистон Республикасида 27 та ҳуқуқбузарлик аниқланган.
Таъкидланишича, карантин даврида маросимларни ўтказишнинг белгиланган талабларига риоя қилмаган фуқаролар ўрнатилган тартибда маъмурий жавобгарликка тортилади. Жумладан, Сурхондарё вилояти Бандихон туманидаги «Бирдамлик» маҳалласида яшовчи фуқаро Б.Шокировнинг 28 сентябрь куни ўтказилган никоҳ тўйига тўй эгалари 30 кишидан кўп одам чақириб, карантин қоидаларини бузган. Шу сабаб фуқарога нисбатан Маъмурий жавобгарлик тўғрисидаги кодекснинг 54-модда 2-қисмига асосан маъмурий баённома расмийлаштирилган.
Мазкур ҳуқуқбузарлик учун фуқаролар базавий ҳисоблаш миқдорининг 20 бараваридан 30 бараваригача, мансабдор шахслар эса 30 бараваридан 50 бараваригача миқдорда жарима тўлашига сабаб бўлади.
Эслатиб ўтамиз, Ўзбекистонда коронавирус эпидемияси тарқалишининг олдини олиш мақсадида 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган эди. Ушбу тақиқдан сўнг тўй маросимларини ўтказишга уринганларга нисбатан ҳатто жиноят иши ҳам қўзғатилди.
Мамлакатда эпидемиологик вазият барқарорлашиб, нисбатан назорат остига олингач, Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилди.
Мамлакатда коронавирус билан боғлиқ вазият кескинлашгани сабабли 10 июлдан бошлаб мамлакатда тўйларни ўтказиш яна тақиқланди.
Ўзбекистонда 15 августдан 30 кишилик тўйларни ўтказишга яна рухсат берилди.
Изоҳ (0)