Ўзбекистон Президент Шавкат Мирзиёев 2 октябрь куни Қорақалпоғистон Республикасига ташрифи давомида Нукус шаҳридаги «Қорақалпоқ балиқ саноат» масъулияти чекланган жамият фаолияти билан танишди. Бу ҳақда Президент матбуот хизмати хабар берди.
Маълум қилинишича, бу корхона йилига 200 тонна балиқ ва 5 миллион дона балиқ личинкаси етиштириш, 5 минг тонна озуқа ем тайёрлаш қувватига эга. У 2020 йилнинг июль ойида фаолият бошлади, 35 та иш ўрни яратилди.
Қайд этилишича, лойиҳанинг аҳамияти шундаки, корхонада ёпиқ сиғимда интенсив усулда балиқ етиштирилади. Яъни, сувдан такроран фойдаланиш эвазига катта ҳажмда сув тежалади. Масалан, 200 тонна балиқ етиштириш учун оддий шароитда 1,5 миллион метр куб сув сарфланса, бу ерда 250 метр куб етарли. Корхонада, шунингдек, қайта ишлаш қуввати ва музлатгич ташкил этилган.
Шунингдек, корхонада қишлоқ хўжалиги тармоқларидаги лойиҳалар тақдимот қилинди. Давлат раҳбари чорвачиликда оилавий кооперсияларни йўлга қўйиб, паррандани кўпайтириб, гўшт нархини арзонлаштириш чораларини кўриш муҳимлигини таъкидлади. Ҳудудда ер ва сувнинг аниқ ҳисобини юритиш, бунга ахборот технологияларини жорий қилиш бўйича кўрсатмалар берилди.
Эслатиб ўтамиз, Шавлат Мирзиёев Нукусда 2 октябрь куни Қорақалпоғистон Жўқорғи Кенгесининг навбатдан ташқари 8-сессиясида иштирок этди, Сессияда Жўқорғи Кенгес раиси лавозимига Мурат Камалов сайланди,
Изоҳ (0)