Тошкент шаҳар маъмурий судида 2 октябрь куни UzAuto Motors компаниясининг Монополияга қарши курашиш қўмитаси махсус комиссиясининг қарори устидан берган шикояти бўйича суд иши бошланди. Бу ҳақда Олий суд матбуот хизмати хабар берди.
Маълум қилинишича, UzAuto Motors компанияси Монополияга қарши курашиш қўмитаси махсус комиссиясининг 2020 йил 19 августдаги қарорини ҳақиқий эмас, деб топиш тўғрисидаги шикоят аризасини берган ва бу аризани кўриб чиқиш бўйича суд жараёни бошланди. Ушбу маъмурий иш судья Ғ. Давлатов раислигида кўрилмоқда.
2 октябрь куни бўлиб ўтган суд мажлисида тарафларнинг шахси аниқланиб, уларнинг ҳуқуқ ва мажбуриятлари тушунтирилди.
Маълум қилинишича, аризачи — UzAuto Motors акциядорлик жамияти вакили судга суд мажлисини ёпиқ тарзда ўтказиш тўғрисидаги илтимоснома киритди.
»Мазкур илтимоснома юзасидан тарафлар фикри сўралганидан сўнг суд ўз ўрнида ажрим қилиб, мазкур илтимоснома ишни кўриш жараёнида тарафлар томонидан давлат сири билан боғлиқ махфийлаштирилиши лозим бўлган ҳужжатлар суд муҳокамасида кўрилиши учун тақдим этилганидан сўнггина муҳокама қилиниши учун очиқ қолдирилди ва суд ишни мазмунан кўриб чиқишни бошлади», — дейилади Олий суд хабарида.
Дастлаб сўз навбати UzAuto Motors вакилига берилди. Компания вакили ўз важида билдиришича, жавобгар —Монополияга қарши курашиш қўмитаси ўтказган текширув жараёнида Ўзбекистон Республикаси Вазирлар Маҳкамасининг 2010 йил 28 октябрдаги 239-сонли қарори нотўғри татбиқ этилган, UzAuto Motors томонидан ишлаб чиқариладиган товарларга нархлар шакллантирилишида Вазирлар Маҳкамасининг 2018 йил 30 мартдаги 249-сонли қарори татбиқ этилиши лозим, жамият томонидан ишлаб чиқариладиган товарларнинг нархини келишиш жамиятнинг Кузатув кенгаши ваколатига киради.
Шунингдек, аризачининг вакили томонидан маълум қилинишича, Монополияга қарши курашиш қўмитасининг махсус комиссияси томонидан «Рақобат, табиий монополиялар, истеъмолчиларнинг ҳуқуқларини ҳимоя қилиш ва реклама тўғрисидаги қонун ҳужжатларини бузганлик учун иш қўзғатиш ва уларни кўриб чиқиш тартиби тўғрисида»ги низомнинг 18-банди талаблари бузилган ҳолда қарор қабул қилинган, чунки махсус комиссия йиғилишини ўтказишни бошқа кунга қолдириш тўғрисидаги илтимоснома киритилган бўлса-да, UzAuto Motors’га ёзма фикр ва далилларни тақдим этиш ҳуқуқи чекланган.
Хабар берилишича, жавобгарнинг вакили томонидан аризачининг важларига нисбатан фикр-мулоҳазалари тингланганидан сўнг мазкур важларга нисбатан қўшимча ҳужжатларни тақдим этиши тўғрисида фикр билдирилди ва суд муҳокамаси тақдим этилган қўшимча далилларни ўрганиш ҳамда суд мажлисини ёпиқ тарзда ўтказиш учун киритилган илтимоснома юзасидан ҳужжатларни ўрганиш учун кейинга қолдирилди.
Кейинги суд мажлиси 2020 йил 9 октябрь куни соат 11:00 да ўтказилади.
Эслатиб ўтамиз, депутат Расул Кушербаевнинг танқидлари ортидан Монополияга қарши курашиш қўмитаси UzAuto Motors АЖга нисбатан иш қўзғатган эди. Қўмита компания томонидан «Рақобат тўғрисида»ги қонунни бузиш аломатларини аниқлаган.
Қўмитанинг 2020 йил 19 август куни ўтказилган йиғилишида махсус комиссия томонидан ўтказилган текширувлар компания автомобиль нархларини асоссиз оширганини тасдиқлаган. Унга кўра, автомобиллар нархи 3 миллион сўмдан 19 миллион сўмгача асоссиз оширилгани аниқланган.
Мазкур ўрганиш натижалари омма учун эълон қилингач UzAuto Motors Монополияга қарши курашиш қўмитаси қошидаги махсус комиссия қабул қилган қарор устидан судга шикоят қилишини билдирганди ва кейинроқ компания Тошкент шаҳар маъмурий судига шикоят қилгани маълум бўлганди.
Изоҳ (0)